काठमाडौं (हाम्रो खेलकुद) – न्यु रोड टिम (एनआरटी) केपी ओली कप फुटबल प्रतियोगिताको फाइनलमा प्रवेश गरेको छ ।

दशरथ रंगशालामा जावलाखेल युवा क्लबमाथि ३-० को जित निकाल्दै एनआरटीले उपाधि भिडन्तमा स्थान पक्का गरेको हो । एनआरटीको जितमा संजिव विष्टले दुई तथा विवेक गुरुङले १ गोल गरे ।

खेलको छैटौं मिनेटमा नै विवेक गुरुङले एनआरटीलाई अग्रता दिलाए । बायाँ विंगबाट आएको क्रसमा विवेकले फार पोस्टमा अनमार्क रहेको अवस्थामा ६ यार्ड बक्स नजिकबाट सहजै गोल गरे ।

दोस्रो हाफमा संजिवले लगातार २ गोल गर्दै एनआरटीको जित पक्का गरे । ५० औं मिनेटमा रिचार्ड विल्सनको पासमा मिडफिल्डबाट बल अघि बढाउँदै गोलरक्षक उनेश चौधरीलाई वन भर्सेस वनमा बिट गरे । लगत्तै पेनाल्टी क्षेत्र बाहिरबाट उनले गरेको प्रहारमा उनेश बिट भएपछि स्कोर ३-० पुगेको थियो ।

दोस्रो हाफको मध्यतिर जावलाखेलका निरज चौधरी घाइते भए । विवेकको ट्याकल आगड उनलाई एम्बुलेन्समा अस्पताल लागिएको थियो ।

आजै हुने दोस्रो सेमिफाइनलमा साविक विजेता मछिन्द्र फुटबल क्लब र भारतको मानेभन्ज्याङ्ग फुटबल क्लब खेल्नेछन् । फाइनल फागुन १९ गते दशरथ रंगशालामा नै हुनेछ ।

प्रतियोगिताको विजेताले ११ लाख रुपैयाँ र दोस्रो हुने टोलीले ५ लाख रुपैयाँ प्राप्त गर्नेछन् । प्रतियोगिता सर्वोत्कृष्ट खेलाडीले १ लाख, उत्कृष्ट गोलरक्षक, गोलकर्ता र उदीयमान खेलाडीले समान ५० हजार रुपैयाँ पाउनेछन् । गत वर्ष केपी ओली कपको उपाधि मछिन्द्र क्लबले जितेको थियो ।