काठमाडौं (हाम्रो खेलकुद) – शुक्रबार देखि काठमाडौंमा सुरु हुने साफ यु-१६ महिला च्याम्पियनसिपको सम्पूर्ण तयारी पुरा भएको एन्फाले जनाएको छ । आज काठमाडौंमा एक पत्रकार सम्मेलन गर्दै एन्फाले सम्पूर्ण तयारी पुरा गरेको जानकारी गरेको हो ।

च्यासल रंगशालामा हुने भनिएको यस प्रतियोगिता सो रंगशाला फिफा प्रतिनिधिद्वारा अयोग्य तोकिएपछि एन्फा कम्प्लेक्समा सारिएको छ । च्यासल रंगशालामा आवश्यक मापदण्ड नपुगेको र मैदान साह्रो भएको भन्दै प्रतियोगिता एन्फा कम्प्लेक्समा सारिएको एन्फाका प्रवक्ता सुरेश शाहले जनाए ।

“साफ प्रतिनिधिको मूल्यांकन अनुसार च्यासल को मापदण्ड नपुगेको र मैदान साह्रो भएका कारण प्रतियोगिता एन्फा कम्प्लेक्समा सारिएको हो”, एन्फा प्रवक्ता सुरेश शाहले भने ।

प्रतियोगितामा नेपाल सहित ४ साफ राष्ट्रले प्रतिस्पर्धा गर्ने छन् । प्रतिस्पर्धा गर्ने भारत, बंगलादेश र भुटान नेपाल आइसकेको समेत एन्फाले जानकारी दिएको छ ।

एन्फाले प्रतियोगिताको टिकट मूल्यदर समेत निर्धारण गरेको छ । साधारण प्यारापिट तर्फ टिकट मूल्य रु १०० र भिआईपी तर्फ रु ३०० निर्धारण गरिएको छ ।प्रतियोगिताको अनुमानित बजेट रु २,१२,२०,९०० रहेको छ । प्रतिस्पर्धी टोलीले च्यासल सहित सातदोबाटोमा प्रशिक्षण गर्नेछन् ।

नेपाली टोलीको प्रशिक्षण चक्र तामाङले गरिरहेका छन् । नेपालको २३ सदस्सीय टोलीको टुंगो समेत लागिसकेको छ । प्रतियोगिताको उद्दघाटन खेलमा भारत र भुटानले फाल्गुन १८ गते दिनको ३ बजे भिड्ने छन् । नेपालले भने आफ्नो पहिलो खेलमा बंगलादेश विरुद्ध फाल्गुन १९ गते खेल्नेछ ।

राउण्ड रोबिनका आधारमा हुने प्रतियोगिताको शीर्ष दुई टोलीले फाइनल खेल्ने छन् । फाइनल खेल फाल्गुन २७ गते हुनेछ ।