काठमाडौं (हाम्रो खेलकुद) – दोस्रो केपी ओली कप फुटबल प्रतियोगितामा आज सेमिफाइनल प्रवेशका लागि २ खेल हुँदैछन् ।

सातदोबाटोस्थित एन्फा कम्प्लेक्सको मैदानमा बिहान ११:३० बजे हुने पहिलो खेलमा आयोजक केपी ओली एफसी र जावलाखेल युथ क्लब भिड्ने छन् । केपी ओली एफसीले उद्दघाटन खेलमा चर्च ब्वाइज युनाइटेड माथि ३-० को जित निकाल्दै जावलाखेल विरुद्धको भेट पक्का गरेको हो । यस्तै जावलाखेलले भने पहिलो चरणमा बाइ पाउँदै आज पहिलो खेल खेल्दै छ ।

यो खेलको विजेताले सेमिफाइनलमा न्यू रोड टिम (एनआरटी) विरुद्ध खेल्ने छ । एनआरटीले थ्री स्टार क्लबलाई हराउँदै सेमिफाइनलमा पुगेको थियो ।

यस्तै दिउँसो ३:०० बजे सुरु हुने दिनको दोस्रो खेलमा नेपाल पुलिस क्लब र साविक विजेता मछिन्द्र एफसी भिड्ने छन् । पुलिसले पहिलो खेलमा त्रिभुवन आर्मी फुटबल क्लबलाई पेनाल्टी सुटआउटमा हराएको थियो। मछिन्द्रले आज प्रतियोगिताको पहिलो खेल खेल्दै छ ।

यो खेलको विजेताले फाइनल प्रवेशका लागि भारतीय क्लब मानेभञ्ज्याङ एफसी विरुद्ध खेल्ने छ । मानेभञ्ज्याङले अर्को भारतीय टोली दिल्ली एफसी विरुद्ध जित निकालेको थियो ।

प्रतियोगिताका सेमिफाइनल अगाडिका खेलहरु सातदोबाटो स्थित एन्फा कम्प्लेक्समा हुने छन् । सेमिफाइनल र फाइनल दशरथ रंगशालामा हुनेछन् । फाइनल फागुन १९ गते हुनेछ ।

नेपाल युवा संघद्वारा आयोजित प्रतियोगिताको विजेताले ११ लाख रुपैयाँ र दोस्रो हुने टोलीले ५ लाख रुपैयाँ प्राप्त गर्नेछन् ।

प्रतियोगिता सर्वोत्कृष्ट खेलाडीले १ लाख, उत्कृष्ट गोलरक्षक, गोलकर्ता र उदीयमान खेलाडीले समान ५० हजार रुपैयाँ पाउनेछन् । गत वर्ष केपी ओली कपको पहिलो संस्करणको उपाधि मछिन्द्र क्लबले जितेको थियो ।