दिपक बोहोरा, पाँचथर

सर्लाहीको बागमती युथ क्लब चौथो पाँचथर गोल्डकप फुटबल प्रतियोगिताको सेमिफाइनलमा प्रवेश गरेको छ । फिदिम माविको मैदानमा सोमबार भएको खेलमा पथरी ११ फुटबल क्लबलाई पेनाल्टी सुटआउटमा ४–१ ले हराउँदै अन्तिम चारमा पुगेको हो ।

निर्धारित समय गोलरहित बराबरी टुंगिएपछि खेल टाइब्रेकरमा पुगेको थियो । पेनाल्टी सुटआउटमा बागमतीका निर्मल बल, देवा गुरुङ, अनिष राना मगर र अभी लामाले गोल गरेका थिए । पथरीको लागि निरोज परियालले मात्र गोल गरे । मन्जिल खड्का र ग्लोरीको प्रहार बागमतीका गोलकिपर रौनक चौलागाइले रोकेका थिए ।

प्रतिस्पर्धात्मक खेलको पाँचौं मिनेटमा पथरीका ग्लोरीको प्रहार बागमीतका गोलकिपर रौनकले मुस्किलले रोकका थिए । १२ औं मिनेट पथरीका सुबास तामाङले गोल गर्ने राम्रो अवसर गुमाएका थिए ।

५० औं मिनेटमा बागमतीका अभी शक्तिशाली प्रहार पथरीका गोलकिपर सुजित चौधरीले पञ्च गर्दै बचाएका थिए । पहिलो हाफमा निकै राम्रो प्रर्दशज गरेको पथरी दोश्रो हाफमा बागमतीको दबाबमा परेको थियो ।

पेनाल्टी सुटआउटमा दुई प्रहार रोकका बागमतीका गोलकिपर रौनक म्यान अफ द म्याच घोषित भए र उनले ५ हजार रुपैयाँ प्राप्त गरे । टेकनाथ काफ्ले खेलको फ्यान अफ दि म्याच चुनिए र उनले २ हजार ५ सय रुपैयाँ प्राप्त गरे ।

ए डिभिजन टोली त्रिभुवन आर्मी फुटबल क्लबसहित ८ टोलीले सहभागिता रहेको प्रतियोगिताको विजेताले ट्रफीसहित ५ लाख ५ हजार, दोस्रोले दुई लाख ५५ हजार रुपैयाँ प्राप्त गर्नेछन् ।

पाँचथर गोल्डकपमा मंगलबारको खेल

आर्मीविरुद्ध हिल्स फुटबल एकेडेमी, भारत
खेल समय – दिउँसो २ बजे