काठमाडौं (हाम्रो खेलकुद) – थ्री स्टार क्लबले अखिल नेपाल फुटबल संघ (एन्फा) अनुशासन समितिले गरेको कारवाहीको निर्णय बदर गर्न पाउँ भन्दै पुनरावेदन समितिमा अपिल गरेको छ ।

अनुशासन समितिको पुस १५ गते बसकेको बैठकले थ्री स्टार र ती दुई विदेशी खेलाडी अजयी मार्टिन्स र पिटर सेगुनलाई श्रम स्वीकृती भएपनि विना भिसा खेलेको खेलाएको भन्दै जरिवाना गर्ने निर्णय गरेको थियो ।

एन्फाले विधानको अधिनमा बनेको सहिद स्मारक ए डिभिजन लिग फुटबको नियमावली समेतको व्यवस्थाका आधारमा मार्टिन्स र सेगुनले आफ्नो दायित्व पूरा नगरेको भन्दै जनही ५० हजार रुपैयाँ जरिवाना गराउने कारवाही भएको थियो ।

उक्त निर्णयमा थ्री स्टार क्लबले श्रम स्वीकृति बहाल रहँदै गर्दा पनि श्रम स्वीकृति नलिएको भन्दै खेलाडी र क्लबलाई जरिवाना गर्ने निर्णय त्रुटिपूर्ण रहेको जनाएको छ । एन्फाले यसअघि ए डिभिजन लिगमा अजायी मार्टिन्स कायोडे र पिटर सेगुनले लिग दौरान श्रम स्वीकृति भएर भिसा नभएको कारण कारवाही गरेको बताएको छ ।

थ्री स्टार क्लबले त्यस समयमा दुवै खेलाडीको श्रम स्वीकृति रहेको तर भिसामा प्रक्रियागत ढिलाइ मात्र भएको पनि जनाएको छ । सँगसँगै थ्री स्टारले एन्फाले तोकिएको समयमा लिग सम्पन्न गर्न नसक्दा भिसा थप गर्नुपर्ने अवस्था आएको र नियमानुसार गर्दा प्रक्रियागत ढिलाइ भएको जनाएको छ ।

सोही पत्रमा त्यस्तै विना भिसा तथा विना श्रम स्वीकृति खेलाडीहरू सहभागी गराउने थ्री स्टार क्लबले पनि आफ्नो दायित्व पूरा नगरेको पाइएकाले विधान बमोजिजम ३ लाख रुपैयाँ जरिवाना गर्ने निर्णय गरेको जनाइएको छ ।

त्यसपछि एपिएफले निर्णय प्रति आफूहरु सन्तुष्ट नरहेका कारण एपिएफ पुनरावेदन कमिटीमा गएको थियो । यसमै थ्री स्टार पनि कारवाहीप्रति असन्तुष्टि व्यक्त गर्दै पुनरावेदनमा गएको हो ।