काठमाडौं (हाम्रो खेलकुद) – न्यू रोड टिम (एनआरटी) राष्ट्रिय युवा संघद्वारा आयोजित केपी ओली कपको सेमिफाइनलमा प्रवेश गरेको छ ।

सातदोबाटोस्थित एन्फा कम्प्लेक्स आइतबार भएको पहिलो खेलमा थ्री स्टार क्लब माथि १-० को जित निकाल्दै एनआरटी अन्तिम चारमा प्रवेश गरेको हो ।

एनआरटीको जितमा विवेक गुरुङले एकमात्र गोल गरे । खेलमा धेरै अवसरहरु सिर्जना नभएपनि पहिलो हाफमा भएको एकमात्र गोलको मद्दतमा एनआरटीले जित निकालेको हो ।

१३औं मिनेटमा थ्री स्टारका अरुज सिंहको बक्स भित्र बाट गरेको प्रहार पोस्टको माथिबाट बाहिरियो । २६औं मिनेटमा एनआरटीका अशोक थापाको प्रहार थ्री स्टार गोलरक्षक अभिषेक बरालले सहजै बचाए ।

२९औं मिनेटमा एनआरटीले गोल गर्न सफल भयो । विवेक गुरुङले शक्तिशाली फ्रिकिक गोल गर्दै खेलमा एनआरटीलाई अग्रता दिलाए ।

४२औं मिनेटमा थ्री स्टारका कप्तान योगेश गुरुङले बक्स भित्रबाट पोस्टको माथि प्रहार गरे । पहिलो हाफको अन्त्यमा अरूजकै हेडर पोस्टको थोरै टाढाबाट बाहिरियो ।

६०औं मिनेटमा थ्री स्टारका आशिष चापागाईंको प्रहार ब्लक भएपछि दिपेश घलेले पोस्टको केही टाढा प्रहार गरे ।

६५औं मिनेटमा एनआरटीका संजीव विष्टको प्रहार अभिषेकले सुन्दर ढंगले बचाए । ७१औं मिनेटमा आशिषको प्रहार एनआरटी गोलरक्षक पुजन होनाले राम्रो बचाउ गरेर बाहिर फालिदिए । ८६औं मिनेटमा थ्री स्टारकै आदित्य शाक्यको हेडर पनि पोस्टको दिशामा रहन सकेन ।

एनआरटीले अब सेमिफाइनलमा केपी ओली एफसी र जावलाखेल युथ क्लब बीचको विजेता विरुद्ध खेल्ने छ । प्रतियोगितामा आजको दोस्रो खेलमा दिनको ३ बजे नेपालले पुलिस क्लब र त्रिभुवन आर्मी फुटबल क्लब भिड्ने छन् ।

प्रतियोगिताका सेमिफाइनल अगाडिका खेलहरु सातदोबाटो स्थित एन्फा कम्प्लेक्समा हुने छन् । सेमिफाइनल र फाइनल दशरथ रंगशालामा हुनेछन् । प्रतियोगिता फागुन १९ गते समापन हुनेछ ।

प्रतियोगिताको विजेताले ११ लाख रुपैयाँ र दोस्रो हुने टोलीले ५ लाख रुपैयाँ प्राप्त गर्नेछन् । प्रतियोगिता सर्वोत्कृष्ट खेलाडीले १ लाख, उत्कृष्ट गोलरक्षक, गोलकर्ता र उदीयमान खेलाडीले समान ५० हजार रुपैयाँ पाउनेछन् । गत वर्ष भएको केपी ओली कपको पहिलो संस्करणको उपाधि मछिन्द्र क्लबले जितेको थियो ।