काठमाडौं (हाम्रो खेलकुद) – दोस्रो संस्करणको केपी ओली कप फुटबल प्रतियोगिताको उद्दघाटन खेलमा आयोजक केपी ओली एफसी विजयी भएको छ ।

राष्ट्रिय युवा संघले आयोजना गरेको प्रतियोगितामा एन्फा कम्प्लेक्समा भएको खेलमा केपी ओली एफसीले चर्च ब्वाइज युनाइटेड माथि ३-० को जित हात पारेको हो । खेलको सबै गोल दोस्रो हाफमा आएको थियो ।

खेलको पहिलो हाफमा भने दुवै टोलीले अवसर सिर्जना गर्न संघर्ष गर्नुपर्यो । छैठौं मिनेटमा चर्च ब्वाइजका धीरज मगरको क्रसमा विशाल बस्नेतको हेडर पोस्ट तर्फ जान सकेन । २७औं मिनेटमा आयोजकका सुमित श्रेष्ठले खेलेको क्रसमा रोशन राना मगरको प्रहार ब्लक हुन पुग्यो ।

४५औं मिनेटमा आयोजककै सुरज जिउ ठकुरीको प्रहार पोस्टभन्दा केही टाढाबाट बाहिरियो । त्यसको अर्को मिनेटमा सुरजको पासमा फोडे फोफानाको प्रहार चर्च ब्वाइजका गोलकिपर दिप कार्कीले उत्कृष्ट बचाउ गरे ।

४६औं मिनेटमा आयोजकका रोहन कार्कीको प्रहार पनि बाहिर जान पुग्यो । ५७औं मिनेटमा भने केपी ओली एफसीले अग्रता लियो। रोहन कार्कीको थ्रु पासमा फोडे फोफानाले गोल गर्दै खेलमा आयोजकलाई अग्रता दिलाए।

६८औं मिनेटमा आयोजकले अग्रता दोब्बर बनायो । फोडेको क्रसमा जय गुरुङले बक्स भित्रबाट राम्रो फिनिश गर्दै अग्रता दोब्बर बनाएका थिए ।

यस्तै तेस्रो गोल ७९औं मिनेटमा आएको थियो । मणि लामाको फ्रिकिक दिपले बचाएपछि आयोजकले कर्नर पाएको थियो । सो कर्नरमा जयले व्यक्तिगत दोस्रो गोल गर्दै अग्रता तीन गोलको बनाए ।

केपी ओली एफसीले अब सेमीफाइनल प्रवेशका लागि जावलाखेल युथ क्लब विरुद्ध खेल्नेछ ।

केपी ओली कपमा भोलि शनिबार कुनै खेलमा रहेको छैन भने आईतबार दुई खेल छन् । बिहान ११:३० बजेको खेलमा न्यू रोड टिम र थ्री स्टार क्लब भिड्दा दिउँसो तीन बजे हुने खेलमा त्रिभुवन आर्मी एफसी र नेपाल पुलिस क्लब भिड्ने छन् ।

प्रतियोगिताका सेमिफाइनल अगाडिका खेलहरु सातदोबाटो स्थित एन्फा कम्प्लेक्समा हुने छन् । सेमिफाइनल र फाइनल दशरथ रंगशालामा हुनेछन् । प्रतियोगिताको फाल्गुन १९ का दिन समापन हुने छ ।

प्रतियोगिताको विजेताले ११ लाख रुपैँया र उपविजेताले ५ लाख रुपैँया प्राप्त गर्नेछन् । प्रतियोगिता सर्वोत्कृष्ट खेलाडीले १ लाख, उत्कृष्ट गोलरक्षक, गोलकर्ता र उदीयमान खेलाडीले समान ५० हजार रुपैयाँ पाउनेछन् । गत वर्ष सम्पन्न भएको केपी ओली कपको पहिलो संस्करणको उपाधि मछिन्द्र क्लबले जितेको थियो ।