हेटौंडा (हाम्रो खेलकुद) – मछिन्द्र फुटबल क्लबले छैटौं बागमती गोल्ड कप फुटबल प्रतियोगिताको उपाधि जितेको छ । नेपाल एपिएफ फुटबल क्लबलाई बिहीबार ४–० ले हराउँदै मछिन्द्र च्याम्पियन बनेको हो ।

बागमती–८ स्थित जनता माविको खेल मैदानमा मछिन्द्रका लागि विदेशी खेलाडी क्रिष्टोफर चिजोवाले २ र करिमले १ गोल गरे । खेलको १४ औं मिनेटमा करिमले गोल गर्दै मछिन्द्रलाई अग्रता दिलाएका थिए ।

चिजोवाले खेलको ५७ औं मिनेटमा गोल गरे । ६१ औं स्टेफेन समिरको प्रहार एपिएफका डिफेन्डर कुलदीप कार्कीले आत्मघाती गोल गर्न पुगेका थिए । चिजोबाले ६२ औं मिनेटमा अर्को गोल गरेपछि मछिन्द्रले खेलमा बलियो पकड बनाएको थियो ।

मछिन्द्रले उपाधिसहित १० लाख र एपिएफले लाख रुपैयाँमा प्राप्त गर्यो । मछिन्द्रका उत्सव राई प्रतियोगिताको सर्वोत्कृष्ट खेलाडी चुनिए । उनले १ लाख १ हजार रुपैयाँ प्राप्त गरे ।

मछिन्द्रका प्रदीप भण्डारी उत्कृष्ट गोलरक्षक, एपिएफका कुलदीप कार्की उत्कृष्ट डिफेन्डर, विशाल तामाङ उत्कृष्ट मिडफिल्डर , मछिन्द्रका हिसुब थपलिया उत्कृष फरवार्ड र मछिन्द्रका सन्तोष न्यौपाने उत्कृष्ट प्रशिक्षक घोषित भए । उत्कृष्ट सबैले समान २५ हजार रुपैयाँ प्राप्त गरेका छन् ।

प्रतियोगिताको अवसरमा आयोजकले समृद्ध समाज राष्ट्रिय दैनिकका सञ्चारकर्मी रविन्द्र वाईबालाई उत्कृष्ट खेलकुद पत्रकारिता पुरस्कारबाट सम्मान गरिएको छ । वाईबालाई १५ हजार रुपैयाँसहित सम्मान गरिएको हो । यस्तै रेडियो झुरझुरका विवेक सिंतान, बागमती संदेशका आषिश बल, गोल नेपालका विक्रम बानियाँ र अनिरुद्ध खबरका अनिल पराजुलीलाई पनि सम्मान गरिएको छ ।

बागमती गाउँपालिकाका खेलकुद विकास समितीका अध्यक्ष टिकालाल श्रेष्ठको अध्यक्षतामा भएको समापन कार्यक्रममा बागमती प्रदेश सरकारकी सामाजिक विकासमन्त्री कुमारी मोक्तान, बागमती प्रदेश सभा सदस्य प्रेम बहादुर पुलामी , अखिल नेपाल फुटबल संघका महासचिव किरण राई, बागमती गाउँपालिकाका अध्यक्ष सर्केश घलान लगायतले पुरस्कृत गरेका थिए ।