एजेन्सी – अष्ट्रेलियाले न्युजिल्यान्डविरुद्धको तीन टी–२० सिरिजको पहिलो खेलमा रोमाञ्चक जित दर्ता गरेको छ । अष्ट्रेलियाले वेलिंगटनमा भएको खेलमा ६ विकेटको जित निकाल्दै तीन खेलको शृङ्खलामा १–० को अग्रता बनाएको छ ।

न्युजिल्यान्डले दिएको २१६ रनको लक्ष्य अष्ट्रेलियाले इनिङको अन्तिम बलमा पछ्यायो । अन्तिम बलमा चार रन आवश्यक हुँदा टिम डेभिडले बाउन्ड्री प्रहार गर्दै रोमाञ्चक जित हात पार्न सफल भए । 

अष्ट्रेलियाको जितमा कप्तान मिचेल मार्सले ४४ बलमा दुई चौका र सात छक्का प्रहार गर्दै अविजित ७२ रन बनाए । टिम डेभिडले आफ्नो इनिङ्समा दुई चौका र तीन छक्का प्रहार गर्दै १० बलमा ३१ रनको विनाशकारी इनिङ खेले ।

ओपनिङ जोडी ट्राभिस हेड र डेभिड वार्नरले क्रमशः २४ र ३२ रन बनाए । त्यस्तै ग्लेन म्याक्सवेलले २५ रनको योगदान दिए भने जोस इन्ग्लिसले २० रन बनाए ।

न्यूजिल्याण्डका लागि मिचेल सान्टनरले दुई तथा एडम मिल्ने र लोकी फर्गुसनले एक एक विकेट लिए ।

यसअघि टस जितेर पहिले ब्याटिङ गरेको न्यूजिल्याण्डले २० ओभरमा तीन विकेट गुमाएर २१५ रन बनाएको थियो । रचिन रविन्द्रले ३५ बलमा २ चौका र ६ छक्का प्रहार गर्दै ६८ रन बनाए । ओपनर डेभन कोनवेले ४६ बलमा पाँच चौका र दुई छक्का प्रहार गर्दै ६३ रन बनाए ।

अर्का ओपनर फिन एलेनले १७ बलमा दुई चौका र तीन छक्का प्रहार गर्दै ३२ रन बनाए । ग्लेन फिलिप्स र मार्क च्यापम्यान क्रमशः १९ र १८ रनमा अविजित रहे । अष्ट्रेलियाका लागि मिचेल स्टार्क, प्याट कमिन्स र मिचेल मार्शले समान एक एक विकेट लिए ।

शृङ्खलाको दोस्रो टी–२० शुक्रबार हुनेछ भने टि–२० शृंखला आइतवार तेस्रो खेलसँगै सकिने छ । यी दुई टोलीले टी–२० सिरिजपछि दुई खेलको टेष्ट सिरिज पनि खेल्नेछन् ।