काठमाडौं (हाम्रो खेलकुद) – वाफ च्याम्पियनसिप अन्तर्गत समूह चरणको पहिलो खेलमा सिरिया विरुद्ध खेल्ने नेपाली महिला टोलीको सुरुवाती ११ सार्वजनिक भएको छ । मुख्य प्रशिक्षक राजेन्द्र तामाङले सुरुवाती ११ सार्वजनिक गरेका हुन् ।

नेपालको कप्तानी नियमित कप्तान गोलकिपर एन्जिल्ला तुम्बापो सुब्बाले नै गर्ने छिन् । फ्रान्समा व्यावसायिक फुटबल खेलिरहेकी सावित्रा भण्डारीले फरवार्ड लाइन सम्हाल्नेछिन् । यस्तै भारतमा व्यवसायिक फुटबल खेलिरहेका ६ मध्य ५ खेलाडी सुरुवाती ११ मा छन् । ६ जना मध्य रश्मी कुमारी घिसिङ बेन्चमा छिन् ।

नेपाल गुआम संगै प्रतियोगितामा आमन्त्रित टोली हो । नेपाल रहेको समूहमा प्यालेस्टाइन, सिरिया र इराक छन् । अर्को समूहमा आयोजक साउदी अरब, ग्वाम, लेबनान र जोर्डन छन् ।

हिजो भएका समूह ए का खेलमा लेबनानले गुआममाथि ४-३ को जित निकालेको थियो भने जोर्डनले घरेलु टोलीमा साउदी अरेबिया माथि ३-१ को जित निकालेको हो ।

दुवै समूहका शीर्ष दुई टोलीले सेमीफाइनलको यात्रा तय गर्ने छन् ।

सुरुवाती ११: एन्जिला तुम्बापो सुब्बा (कप्तान, गोलकिपर), अमृता जैशी, गीता राना, हिरा कुमारी भुजेल, रेखा पौडेल, पूजा राना, अमिषा कार्की, दीपा शाही, सावित्रा भण्डारी, प्रिती राई, अनिता बस्नेत