काठमाडौं (हाम्रो खेलकुद) – अखिल नेपाल फुटबल संघ (एन्फा) का उपाध्यक्ष दावा लामा बिहीबार एन्फा कार्यसमितिको बैठकमा उपस्थित भएनन् ।

लागु औषध खैरो हिरोइनको कारोबारमा अदालतबाट दोषी रहेको र सजाय भुक्तान नगरी फरार रहेको पाइएको समाचार सार्वजनिक भएयता लामा फुटबलका कुनै पनि गतिविधिमा संलग्न छैनन् ।

गत वर्ष अध्यक्ष पंकज विक्रम नेम्बाङको प्यानलबाट एन्फा उपाध्यक्षमा निर्वाचित लामा लागु औषधको कारोबारमा उच्च अदालतबाट दोषी ठहर भएका व्यक्ति भएको देखिएको छ ।

उच्च अदालत पाटनबाट २०६४ जेठ २० गते फैसला हुँदा लामालाई लागु औषध खैरो हिरोइन बेचबिखन गर्न लागेको कसुरमा दोषी ठहर गर्दै ५ वर्ष कैद र ५ हजार रुपैयाँ जरिवानाको फैसला सुनाइएको थियो । कैद र जरिवानाको फैसला सुनाइएको भएपनि लामा कैद र जरिवाना भुक्तान नगरी फरार रहेको खुलेको हो ।

एन्फाका निर्वाचित २१ सदस्यीय कार्यसमिति मध्ये लामा मात्र अनुपस्थित भएका हुन् । सातदोबाटोस्थित एन्फा मुख्यालयमा शुक्रबार भएको बैठकमा अध्यक्ष नेम्बाङ , अन्य पदाधिकारी र सदस्य गरि १९ जना भौतिक रुपमा तथा अर्का उपाध्यक्ष दीपक खतिवडा भर्चुलमाध्यमबाट बैठकमा उपस्थित थिए ।

पहिलो दिन बैठकमा चर्चा नभएपनि शुक्रबार पुनः बस्ने बैठकमा लामाका बारेमा प्रश्न उठ्ने सम्भावना रहेको बताइएको छ ।फागनु १४ गते नियमित साधारण सभाको तयारीका रुपमा बिहीबारका लागि बोलाइएको बैठक केहि समयमै स्थगित भएको र शुक्रबारका लागि पुनः डाकिएको एन्फाका एक पदाधिकारीले जानकारी दिए ।

बैठकमा झण्डै ३० वटा भन्दा बढी एजेन्डा रहेको र बिहीबार २ वटा एजेन्डामा मात्र छलफल गरेर बैठक स्थगित भएको बताइएको छ । कार्यसमितिका पदाधिकारी र सदस्यले विषय बस्तुमा अध्ययनका लागि समय अभाव भएको आवाज उठाएपछि अध्यक्ष नेम्बाङ बैठक स्थगित गरेका थिए । एन्फाले सदस्यहरु पेमा डोल्मा लामा र रविन्द्र चन्दले थप गर्न माग गरेको बुँदालाई एजेण्डालाई पनि समावेश गरेको बताइएको छ ।