पोखरा (हाम्रो खेलकुद) – पोखरा रंगशालामा शुक्रबार सुरु भएको पोखरा नगरपालिका वडा स्तरीय फुटवल प्रतियोगिताको उद्घाटन खेलमा वडा नं १७ ले वडा नं ५ लाई २–१ ले हराएको छ । १७ को जितमा पूुर्व राष्ट्रिय खेलाडी राजेन्द्र तामाङ र प्रताप सैजुले गोल गरे । वडा नं ५ का लागि अविरल गिरीले एक गोल गरे ।

वडा नं ११ ले वडा नं २५ लाई ४–१ ले हरायो । खेलपछि वडा नं २५ ले वडा नं ११ विरुद्ध उजुरी हालेको छ । वडा नं १६ ले वडा नं १ लाई २–१ ले हरायो । वडा नं ६ ले वडा नं २ लाई टाईब्रेकरमा ४–२ ले हराएको थियो । ७० मिनेटको खेलमा गोल नभएपछि खेल टाइब्रेकरमामा गएको थियो । दीनेश मल्लको ६ गोलसँगै वडा नं १५ ले वडा नं ४ लाई ९–० ले हरायो । शनिबार अञ्चल प्रहरी कार्यालयको मैदानमा ५ वटा खेल हुने जिल्ला खेलकुद विकास समितिका कार्यालय प्रमुख प्रकाश बरालले बताए ।
पोखरा उप–महानगरपालीकाको आयोजना, जिल्ला खेलकुद विकास समिति कास्कीको संयोजन, एन्फा कास्कीको व्यबस्थापनमा करीब दुई दशक पछि पोखरामा उक्त प्रतियोगिता पहिलो पटक सुरु भएको जिल्ला खेलकुद विकास समितिका अध्यक्ष याम बहादुर गुरुङले बताए । प्रतियोगितामा २९ वडा मध्ये २३ वडाको सहभागिता रहेको छ ।

पश्चिमाञ्चल क्षेत्रिय प्रशासक खगराज बरालले प्रतियोगिताको उद्घाटन गरे । पोखरा उप–महानगरपालीकाका कार्यकारी अधिकृत नवराज ढुंगनाको अध्यक्षतामा सम्पन्न भएको उद्घाटन सत्रमा पश्चिमाञ्चल क्षेत्रिय खेलकुद विकास समितिका अध्यक्ष खगराज पौडेल, प्रतियोगिताका संयोजक पोखरा उपमहानगरपालीकाका बरिष्ठ कानुनि अधिकृत नारायण शर्मा, एन्फा कास्कीका उपाध्यक्ष मिलन गुरुङ, जिल्ला खेलकुद विकास समितिका कार्यालय प्रमुख प्रकाश बरालले प्रतियोगिताको सफलताको शुभकामना दिएका थिए ।