पोखरा (हाम्रो खेलकुद)– सहारा यूकेको टोलीलाई नेपाल खेलकुद पत्रकार समन्वय शाखा कास्कीले स्वागत गरेको छ । सहारा क्लब पोखराले आयोजना गरेको १५ औं आहारारा गोल्डकप फुटबल प्रतियोगिताका लागि आएको टोलीलाई मञ्चले शुक्रबार स्वागत गरेको हो ।

सहारा यूकेका अध्यक्ष मिनबहादुर गुरुङ लगायतलाई मञ्चका अध्यक्ष केशव पाठकले खादा र मायाको चिनो प्रदान गरे । सो अवसरमा सहारा यूकेका तर्फबाट पनि मञ्चलाई मायाको चिनो प्रदान गरियो भने क्षेत्रीय फुटबल संघमा हालै अध्यक्षमा चयन भएका खेम गुरुङ सहारा युकेले बधाई ज्ञापन गरिएको थियो । उक्त अवसरमा तमु धिं यूकेका अध्यक्ष ग्याम गुरुङ सहितलाई स्वागत पनि गरिएको थियो ।

सहारा यूकेका अध्यक्ष गुरुङले खलकुद पत्रकार मञ्च कास्कीले अग्रजलाई सम्मान र नयाँ पुस्तालाई प्रोत्साहन स्वरुप पोखरा स्पोर्टस् अवार्ड सुरु गरेकोमा खुसी व्यक्त गरे । उनले आफू सहित समग्र सहारा यूके टीमले यो उत्कृष्ट कार्यमा सहयोग गर्ने बचनबद्धता प्रकट गर्दै यूके पुगेर संस्थागत निर्णय गरेरै सहयोग पठाउने जानकारी दिए ।

सहारा क्लबका सल्लाहकार महेश गुरुङले खेलकुद निकट पत्रकारको हरेक कदममा साथ रहने प्रतिबद्धता जाहेर गरे । मञ्चका सचिव रञ्जन अधिकारीले खेलकुदमा समर्पित संघसंस्थासँग मञ्चले सम्बन्ध स्थापित गर्ने प्रयास स्वरुप यो कार्यक्रम आयोजना गरेको उल्लेख गर्दै सहयोग र सद्भावको सधैं अपेक्षा रहने बताए ।

सहारा यूके भेट्रान र पोखरा भेट्रानबीच मैत्रीपूर्ण फुटबल

यसैबीच, १५ औं आहारारा गोल्डकप फुटबल प्रतियोगिता सञ्चालन भईरहेको सन्दर्भमा शुक्रबार बिहान मैत्रीपूर्ण फुटबलमा सहारा यूके भेट्रानले पोखरा भेट्रान टोलीलाई ३–० ले हरायो । सहारा यूकेका लागि महेश गुरुङ, मिनबहादुर गुरुङ र मनकाजी गुरुङले गोल गरे ।