हेटौंडा (हाम्रो खेलकुद) – नेपाल एपिएफ फुटबल क्लब हेटौंडामा जारी छैटौें सहिद स्मृति स्थानीय तह मकवानपुर फुटबल प्रतियोगिताको सेमिफाइनलमा प्रवेश गरेको छ । अन्तिम क्वाटरफाइनलमा मंगलबार थ्री स्टार क्लबलाई ४–० को फराकिलो अन्तरले हराउँदै एपिएफ अन्तिम चारमा पुगेको हो ।

आहा रारा पोखरा गोल्ड कप फुटबल प्रतियोगिताको फाइनल पुगेका दुई टोली हेटौंडामा पहिलो खेलमै पराजित भएको छ । आहा विजेता त्रिभुवन आर्मी फुटबल क्लब धनकुटाको राजारानी क्लबसँग सडन डेथमा पराजित भएको भोली पल्ट थ्री स्टार एपिएफसँग पराजित भएो छ ।

हेटौंडा–६ स्थित गौरीटार रंगशालामा भएको एकपक्षीय खेलमा एपिएफका लागि विदेशी खेलाडी एनिसेन्ट, सर्ज संग, अनिष महर्जन र प्रदीप लामाले गोल गरेका थिए । खेलको पहिलो हाफमा १ र दोस्रो हाफमा ३ गोल गरेको हो ।

४५ औं मिनेटमा एनिसेटले फ्रिकिकमा गोल गर्दै एपिएफलाई अघि बढाए । थ्री स्टारका डिफेन्डर जीवन गुरुङले प्रदीपलाई फाउल गरेपछि एपिएफले फ्रिकिक पाएको थियो । खेलको ५४ औं मिनेटमा एअनिषले गोल गरे । दायाँबाट आएको क्रसलाई उनले हेडमार्फत गोल गरेका हुन् ।

५८ औं मिनेटमा प्रदीपले गोल गरे । प्रदीपकको प्रहार थ्री स्टारका गोलकिपरले अभिषेक बरालको हातमा पुगेपनि उनले फुत्काएपछि गोल भएको हो । खेलको ७७ औं मिनेटमा विदेशी खेलाडी सर्ज संगले चौथो गोल गरे । एपिएफका प्रदीप म्यान अफ दी म्याच बने र उनले १० हजार रुपैयाँ प्राप्त गरे ।

मकवानपुर जिल्ला फुटबल संघको आयोजनामा जारी प्रतियोगिताको विजेताले विजेताले १५ लाख र दोस्रो हुने टोलीले १० लाख रुपैयाँ प्राप्त गर्नेछ । सर्वोत्कृष्ट खेलाडीले बुलेट मोटरसाइकल र विधागत उत्कृष्टले जनही २५ हजार रुपैयाँ प्राप्त गर्नेछन् ।