एजेन्सी – इंग्लिश प्रिमियर लिग अन्तर्गत शनिबार साँझ भएको खेलमा न्युक्यासल युनाइटेड र लुटन टाउनले रोमाञ्चक बराबरी खेलेका छन् । न्युक्यासलको घरेलु मैदान सेन्ट जेम्स पार्कमा भएको खेल ४-४ को बराबरीमा सकिएको हो ।

न्युक्यासलले सातौं मिनेटमा सन लङ्गस्टाफको गोलमा सुरुवाती अग्रता लिएको थियो । तर २१औं मिनेटमा गाब्रिएल ओशोले २१औं मिनेटमा लुटनका लागि बराबरी गोल गरे । त्यसको दुई मिनेट बित्न नपाउँदै लङ्गस्टाफले व्यक्तिगत दोस्रो गाेल गर्दै न्युक्यासललाई पुनः अग्रता दिलाए ।

४०औं मिनेटमा लुटन पुनः बराबरी गर्न सफल भयो । यसपटक रस बार्कलीले गोल गर्दै खेललाई २-२ को स्थितिमा पुर्याएका थिए । ५९औं मिनेटमा कार्लटन मोरिसले पेनाल्टीमा गोल गर्दै लुटनलाई खेलमा पहिलोपटक अग्रता दिलाए ।

त्यसको मात्र तीन मिनेटमा एलाइजाह अडेबायोले गोल गर्दै लुटनको अग्रता दुई गोलको बनाए । तर ४-२ को स्थितिमा पनि सम्हालिन नसक्दा लुटन बराबरीमा रोकियो ।

६७औं र ७३औं मिनेटमा क्रमसः किइरन ट्रिपियर र हार्भि बार्न्सले गोल गर्दै खेललाई ४-४ को बराबरीमा पुराए ।

न्युक्यासल २३ खेलमा ३३ अंक सहित नवौं स्थानमा छ । लुटन भने २२ खेलमा २० अंक सहित १६औं स्थानमा छ ।

शनिबार साँझ नै भएको पहिलो खेलमा टोटेनहम हट्सपरले एभर्टन विरुद्ध २-२ को बराबरी खेल्यो । यस्तै बाईटनले क्रिस्टल प्यालेस विरुद्ध ४-१ को जित निकाल्दा बर्नली फुलहमले २-२ को बराबरी खेले ।