पोखरा (हाम्रो खेलकुद) – पोखरा रंगशालामा जारी २३ औं आहारारा पोखरा गोल्डकप फुटबल प्रतियोगितामा चर्च ब्वाइज युनाइटेड क्लब र नेपाल पुलिस क्लबबीच अन्तिम क्वार्टरफाइनल खेल हुँदैछ । खेल दिउँसो २ः३० बजे सुरु हुनेछ ।

ए डिभिजन लिग खेलेको पहिलो सिजनमै च्याम्पियन बनेको चर्च ब्वाइज बाइ पाएर सिधै क्वार्टरफाइनल खेल्दैछ । पुलिसले भने अर्को विभागिय टोली एपिएफ फुटबल क्लबको चुनौतीलाई २–० ले समाप्त पार्दै अन्तिम आठमा पुगेको थियो ।

आहा रारा गोल्डकपमा लगातार दास्रो वर्ष पुलिस र चर्च ब्वाइजको भेट हुँदैछ । त्यति बेला चर्च ब्वाइजले पुलिसलाई २–१ ले हराएको थियो । ११ पटक फाइनल खेलिसकेको पुलिसले सर्वाधिक ६ पटक आहाराराको उपाधि जितिसकेको छ ।

क्यानभाराको नाममा २०५८ गोल्डकप जितेको पुलिस त्यसपछि , २०५९, २०६४, २०६५, २०६६ र पछिल्लो पटक ०७४ च्याम्पियन बेनेको थियो । जारी प्रतियोगितामा तीन ए डिभिजन टोली थ्री स्टार, त्रिभुवन आर्मी फुटबल क्लब र जावलाखेल युथ क्लब सेमिफाइनल पुगिसकेका छन्।

पहिलो सेमिफाइनल थ्री स्टर र जावलाखेलबीच बुधबार हुनेछ । आजको विजेताले माघ १८ आर्मीसँग सेमिफाइनल खेल्नेछ । सहारा क्लब पोखराको आयोजना जारी प्रतियोगिताको विजेताले १२ लाख १ हजार र दोस्रो हुने टोलीले ६ लाख १ हजार रुपैयाँ प्राप्त गर्नेछ ।