बागलुङ (हाम्रो खेलकुद) – प्रेस चौतारी नेपाल जिल्ला शाखा बागलुङले प्रेस चौतारी कप–२०८० अन्तर विद्यालयस्तरीय फुटबल प्रतियोगिता गर्ने भएको छ ।

प्रेस चौतारी बागलुङले सोमबार पत्रकार सम्मेलन गरी प्रेस चौतारी नेपालको २६ औं स्थापना दिवसको अवसरमा माघ १९ गतेदेखि २२ गतेसम्म बागलुङमा प्रेस चौतारी कप गर्न लागेको जानकारी गराएको हो ।

पत्रकार सम्मेलनमा अध्यक्ष सिर्जना पन्तले पत्रकारका साथै विद्यालय र विद्यार्थीहरुलाई खेल र खेल पत्रकारितासँग जोड्नको लागि प्रतियोगिताको आयोजना गर्न लागेको बताइन् । प्रतियोगिताले फुटबल प्रतियोगिता सहित समग्र खेल रिपोर्टिङमा समेत टेवा पुग्ने अपेक्षा लिएको अध्यक्ष पन्तको भनाई छ ।

चार दिने प्रतियोगिताको विजेता टोलीले ५० हजार र दोस्रो हुने टोलीले २५ हजार रुपैयाँ प्राप्त गर्ने सचिव अर्जुन कार्कीले बताए । उनले प्रतियोगितामा ४ लाख ७२ हजार ५ सय रुपैयाँ खर्च हुने अनुमान रहेको जानकारी दिए ।

प्रतियोगिता सम्पन्न गर्नको लागि जिल्ला फुटबल संघ बागलुङ र जिल्ला खेलकुद विकास समिति बागलुङको प्राविधिक सहयोगका साथै विभिन्न संघ, संस्था, बैंक तथा स्थानीय तहहरुले सहयोग रहने बताइएको छ ।

प्रतियोगितामा १५ भन्दा बढी विद्यालयहरुको सहभागिता रहने अपेक्षा गरिएको उपाध्यक्ष तथा टिम व्यवस्थापनका संयोजक खेमराज गौतम सुवासले जानकारी दिए । टिम दर्ताको लागि माघ १७ गतेसम्मका समय र दर्ता शुल्क ५ सय रुपैयाँ रहेको बताइएको छ । बागलुङ नगरपालिका–१ रामरेखाको बाङ्गेचौर खेलमैदानमा हुने प्रतियोगिता नकआउटका आधारमा हुनेछ ।