एजेन्सी – समूह चरणमा आफ्नो स्टार खेलाडी मोहम्मद सालाहलाई चोटका कारण गुमाएको इजिप्ट आइभोरी कोस्टमा जारी अफ्रिका कप अफ नेसन्सबाट बाहिरिएको छ । प्रि-क्वार्टरफाइनलमा प्रजातान्त्रिक गणतन्त्र कंगो विरुद्ध सडेन डेथमा ८-७ ले पराजित हुँदै इजिप्ट प्रतियोगिताबाट बाहिरिएको हो ।

निर्धारित ९० मिनेट र अतिरिक्त समय १-१ को बराबरीमा सकिएको थियो । कंगोले मेश्चाक एलियाको गोलको मद्दतले ३७औं मिनेटमा अग्रता लिएको थियो । इजिप्टले पहिलो हाफकै अन्त्य तिर मोस्ताफा मोहमदको पेनाल्टी गोलको मद्दतले खेलमा बराबरी गरेको थियो ।

पेनाल्टी शूटआउटमा इजिप्टका लागि पहिले गोल गरेका मोहमदले गोल गर्न सकेनन् । यस्तै कंगोका आर्थर मासुआकुले पनि पेनाल्टीमा गोल गर्न सकेका थिएनन् ।

त्यसपछि सडेन डेथमा धकेलिएको खेलमा इजिप्टका गोलरक्षक मोहमद अबू गबालले पनि गोल गर्न सकेनन् । कंगोका गोलरक्षक लियोनेल एम्पासी-एन्जाऊले भने गोल गर्दै जित दिलाए ।

गएराति सम्पन्न अर्को प्रि-क्वार्टरफाइनल खेलमा इक्वेटोरियल गिनीले गिनी विरुद्ध १-० को जित निकाल्दै आफ्नो यात्रा जीवितै राखेको छ ।

अफ्रिका कप अफ नेसन्समा आज अन्तिम १६ का थप दुई खेल हुँदै छन् । आज राती १०:४५ बजे हुने खेलमा केप भर्डे र मौरिटानिया भिड्ने छन् भने राति १:४५ बजे सेनेगल र घरेलु टोली आइभोरी कोस्ट भिड्ने छन् ।