दिपक बोहरा, इलाम
इलामे दर्शकको समर्थन पाएको काठमाडौंको न्यू रोड टिम (एनआरटी) प्रथम एनआरएनए इलाम गोल्डकप च्याम्पियन बनेको छ ।

झापाको बिर्तामोड युनाइटेड एफसीलाई टाइब्रेकरमा पराजित गर्दै एनआरटील च्याम्पियन बनेको हो । बिर्तामोडलाई ४-३ गोलअन्तर हराउँदै एनआरटीले उपाधि सहित ५ लाख रुपैयाँ प्राप्त गर्यो।

निर्धारित ९० मिनेटमा गोलरहित बराबरीमा टुङ्गिएको थियो। दुबै टोलीले पाएको अवसर गोल नभएपछि खेल टाइब्रेकरमा गएको थियो ।

टाइब्रेकरमा एनआरटीका गोलरक्षक प्रिसोले बिर्तामोडका एञ्जल गुरुङ र प्रदिप बुढाथोकीको प्रहार रोकेका थिए । श्याम मुर्मू, योगेश गुरुङ र देवेन्द्र तामाङले गोल गरेका थिए ।

यस्तै, एनआरटी राजीव लोप्चनको प्रहार बिर्तामोडका गोलरक्षक सन्दिप लिम्बूले रोके । प्रिसो, सुमित श्रेष्ठ, विवेक गुरुङ र जय गुरुङले गोल गरेका थिए । एनआरटीका प्रिसो उत्कृष्ट गोलरक्षक भए ।

सर्वोत्कृष्ट खेलाडी बिर्तामोडका रोहन कार्की बने ।एनआरटीका हरिओम श्रेष्ठ उत्कृष्ट प्रशिक्षक चुनिए । सर्वाधिक गोलकर्ता इलामका नवयुग श्रेष्ठ बने ।

फाइनल खेलको म्यान अफ दी म्याच बिर्तामोडका हिसुब थपलिया, सञ्जित राई उत्कृष्ट रक्षक र उत्कृष्ट मिडफिल्डर याेगेश गुरूङ बने । विधागततर्फका विजेताले जनही १० हजार रुपैयाँ प्राप्त गरे । उदीयमान खेलाडी रेडहर्स एफसी इलामका गोलरक्षक विवेक मगर बने ।

बिर्तामोडले ३ लाख रुपैयाँ प्राप्त गर्यो। रेडहर्स एफसी इलामले आयोजना गरेको गोल्डकपमा भारतको एक टोलीसहित ८ टोलीको सहभागिता थियो ।