दिपक बोहरा, इलाम

पाँचथर फुटबल क्लब लाई हराउँदै झापाको बिर्तामोड युनाइटेड क्लब प्रथम एनआरएनए इलाम गोल्डकपमा फाइनलमा पुगेको छ ।

बिहीबार ठुलो टुँडिखेलमा भएको खेलमा टाइब्रेकरमा पाँचथरलाई हराउँदै उपाधि नजिक पुगेको छ । बिर्तामोडले पाँचथरलाई ४–२ ले हराएको थियो । निर्धारित ९० मिनेटको समयमा गोलरहित बराबरीमा टुंगिएको थियो ।

टाइब्रेकरमा पाँचथरका साइमन लिम्बु र सुदीप श्रेष्ठले गोल गरे । अशोक खवासको प्रहारलाई बिर्तामोडका गोलरक्षक सन्दिप लिम्बूले रोके । विजु भुजेल र अशोक खवासले गोल गर्न सनेनन् ।

बिर्तामोडका एन्जल गुरुङ, दिवस उराव, रोहन कार्की र प्रदिप बुढाथोकीले गोल गरेका थिए । विशाल दर्जीको प्रहार पाँचथरका गोलरक्षकले रोकेका थिए । खेलको म्यान अफ द म्याच विजेता विर्तामोडका सञ्जित राई घोषित भए र उनले ५ हजार रुपैयाँ प्राप्त गरे ।

बिर्तामोडले अब शनिबार काठमाडौँ न्यू रोड टिम (एनआरटी)सँग फाइनल खेल्नेछ । रेडहर्स एफसीले आयोजना गरेको गोल्ड कपको विजेता उपाधि ५ लाख र दोस्रो हुने टोलीले ३ लाख रुपैयाँ प्राप्त गर्नेछ। सर्वोत्कृष्ट खेलाडी, सर्वाधिक गोलकर्ता, उत्कृष्ट गोलकिपर, डिफेन्डर, मिडफिल्डर र उदीयमान खेलाडीलाई पुरस्कृत गरिने आयोजकले जनाएको छ ।