काठमाडौं (हाम्रो खेलकुद)– अखिल नेपाल फुटबल संघ (एन्फा) को विशेष साधारण सभाले दुई आर्थिक वर्षका लागि अलग अलग दुई कम्पनीलाई लेखा परिक्षणको जिम्मेवारी दिएको छ ।

एन्फाको सोमबार बसेको विशेष साधारण सभाले आर्थिक वर्ष २०७९/८० का लागि एलएसपी एसोसिएट्स र २०८०/८१ का लागि एएनएस एसोसिएट्सलाई नियुक्त गरेको एन्फा प्रवक्ता सुरेश शाहले जानकारी दिए ।

त्यस्तै आजै विहान बसेको एन्फा केन्द्रिय समितिको आकष्मिक बैठकले विजय घलेलाई एन्फा सहायक महासचिवमा नियुक्त गरेको छ । यसअघि सोही पदमा रहेका बसन्त अर्यालाई हटाएर त्यसमा घलेलाई नियुक्त गरेको हो ।

‘कार्यसमितिको अधिकार क्षेत्र भित्र रहेकोले बसन्त अर्याललाई हटाएर त्यसमा विजय घलेलाई नियुक्त गरिएको छ,’ विशेष साधारण सभापछिको पत्रकार सम्मेलनमा शाहले भने,‘उहाँलाई उपयुक्त समयमा अर्को जिम्मेवारी दिने विषयमा छलफल हुनेछ । ’

सोही बैठकले सोमबारको विशेष साधारण सभाका लागि ४३ लाख ३० हजार २ सय रुपैयाँ अनुमानित खर्च हुने निर्णय गरेको प्रवक्ता शाहले जानकारी दिए ।

अढाई महिनाको अन्तरमा दोस्रो पटक एन्फाको विशेष साधारण सभा बसकेको थियो । यसअघि अध्यक्ष पंकज नेम्वाङविरुद्धको अविश्वासको प्रस्तावको निर्णयका लागि कात्तिक २३ गते हेटौंडमा विशेष साधारण सभा भएको थियो । त्यो सभाले अविश्वासको प्रस्तावलाई विफल पारेको थियो ।

एन्फाको नियमित साधारण सभा भने फागुन १४ गतेका लागि यसअघि पुस २ गतेको कार्यसमितिको बैठकले नै निर्णय गरेको थियो ।