काठमाडौँ (हाम्रो खेलकुद) – त्रिभुवन आर्मी क्लबका प्रशिक्षक चक्र तामाङका नेपाली यु–१६ महिला राष्ट्रिय टोलीको मुख्य प्रशिक्षक नियुक्त भएका छन् । अखिल नेपाल फुटबल संघ (एन्फा)का महासचिव किरण राईले तामाङलाई नियुक्ती पत्र दिएका थिए ।

तामाङको प्रशिक्षणमा नेपाली टोलीले फागुन १८ देखि २७ सम्म स्वदेशमै आयोजना हुने साफ यू–१६ महिला च्याम्पियनसिपमा प्रतिस्पर्धा गर्नेछ । च्याम्पियनसिप ललितपुरको च्यासल रंगशालामा हुनेछ ।

यसअघि यू–१८ महिला टोलीको मुख्य प्रशिक्षकको जिम्मेवारी सम्हालेका तामाङ आर्मीको महिला टोलीको मुख्य प्रशिक्षक हुन् । उनले आर्मी पुरुष टिमको सहायक प्रशिक्षकको रुपमा समेत जिमेम्वारी निर्वाह गरिसकेका छन् ।

यु १६ टोलीको सहायक प्रशिक्षकमा भगवती थापा र पासाङ लामा तथा गोलकिपिङ प्रशिक्षकमा गंगाराम देउजा नियुक्त भएका छन् । च्याम्पियनसिपमा नेपालसँगै भुटान, बंगलादेश र भारतको सहभागिता रहेको छ ।

फागुन १९ गते बंगलादेशसँग खेल्दै नेपालले च्याम्पियनसिपको यात्रा सुरु गर्नेछ । नेपालले फागुन २१ गते भुटान र फागुन २४ गते भारतसँग खेल्नेछ । राउण्ड रोबिनको आधारमा हुनेछ च्याम्पियनसिपमा शीर्ष २ टोलीले फागुन २७ गते फाइनल खेल्नेछन् ।