एजेन्सी – म्यानचेस्टर युनाइटेड र टोटेनहम हटस्परले इंग्लिस प्रिमियर लिगमा रोमाञ्चक बराबरी खेल्दै अंक बाँडेका छन् । युनाइटेड र टोटेनहमले २–२ गोलको बराबरी खेल्दै अक बाँडेका हुन् ।

युनाइटेडले घरेलु मैदान ओल्ड ट्राफोर्डमा खेलमा दुई पटक अग्रता लिएपनि टोटेनहमले बराबरी गोल फर्काउदै खेललाई बराबरीमा ल्याएर अंक खोस्न सफल भएको हो ।

युनाइटेडका रसमुस होइलन्ड र मार्कस रासफर्डले गोल गर्दा टोटेनहमका रिचार्लीसन र रोड्रिगो बेन्टानकरले बराबरी गोल फर्काए ।

आइतबार राति भएको खेलको तेस्रो मिनेटमा नै रसमुसको गोलबाट घरेलु टोली युनाइटेडले १–० को अग्रता लिन सफल भयो । तर, युनाइटेडको त्यो अग्रता लामो समय टिकेन । १९औं मिनेटमा रिचार्लीसनले पेड्रो पोरोको पासमा गोल गर्दै खेललाई १–१ गोलको बराबरीमा ल्याए ।

४०औं मिनेटमा रासफर्डले गोल गरेपछि युनाइटेडले पहिलो हाफमा २–१ को अग्रता लिन सफल भयो । रासफर्डले रसमुसको पासमा गोल गर्न सफल भएका थिए ।

तर, युनाइटेडको अर्काे अग्रता पनि लामो समय टिकेन । दोस्रो हाफको शुरुमै रोड्रिगो बेन्टानकरले गोल गर्दै खेललाई २–२ गोलको बराबरीमा ल्याए । उनले यसै विन्टरमा क्लबमा आएका जर्मन फरवार्ड टिमो वेर्नरको पासमा गोल गर्न सफल भएका थिए । त्यसपछि दुवै टोलीबाट थप गोल निस्कन नसक्दा खेल बराबरीमा टुंगियो ।

यस बराबरीसँगै टोटेनहम २१ खेलबाट ४० अंक जोडेर पाँचौं स्थानमा यथावत छ । युनाइटेड समान २१ खेलबाटै ३२ अंक जोडेर सातौं स्थानमा छ । टोटेनहम युनाइटेडभन्दा ८ अंकले अघि छ ।