एजेन्सी – लन्डन क्लब चेल्सीले एफए कपको तेस्रो राउन्डमा सानदार जित दर्ता गरेको छ । चेल्सीले च्याम्पियनसिप क्लब प्रिस्टनमाथि ४–० को सानदार जित निकाल्दै चौथो चरणमा प्रवेश गरेको हो ।

स्टामफोर्ड ब्रिजमा शनिबार राति भएको खेलमा घरेलु टोली चेल्सीको फराकिलो जितमा अर्मान्डो ब्रोजा, थियागो सिल्भा, रहिम स्टर्लिङ र एन्जो फर्नान्डेसले गोल गरे । सबै चार गोल दोस्रो हाफमा भएको थियो ।

५८औं मिनेटमा अर्मान्डो ब्रोजाले गोल गर्दै चेल्सीलाई १–० को अग्रता दिलाए । उनले मालो गुस्टोको पासमा गोल गर्न सफल भए । ६६औं मिनेटमा सिल्भाले गोल गर्दै चेल्सीको अग्रता दोब्बर पारे । ६१औं मिनेटमा मैदान छिरेका सिल्भाले कोल पाल्मेरको पासमा गोल गर्न सफल भएका थिए ।

६९औं मिनेटमा रहिम स्टर्लिङले गोल गरेपछि चेल्सीले खेलमा ३–० को आरामदायी पकड बनायो । उनले झन्डै ३५ यार्डमा प्राप्त फ्रिकिकमा सिधै गोल गर्न सफल भएका थिए । ८५औं मिनेटमा रहिम स्टर्लिङको पासमा एन्जोले गोल गर्दै चेल्सीको फराकिलो जित सुनिश्चित गरे ।

एफए कपकै अन्य खेलमा ब्ल्याकबर्न, सेफिल्ड युनाइटेड, प्लेमाउथ, बर्नमाउथ, साउथह्याम्टन, ब्राइटन, वाटफोर्ड, एस्टन भिल्ला, सेफ वेनस्डे र स्वान्सी सिटीले सफलता हात पार्दै चौथो चरणमा पुगेका छन्।