लमजुङ (हाम्रो खेलकुद) – लाली गुराँस युथ क्लब भुजुङ लमजुङ ३१औं संस्करणको त्रिवेणी कप राष्ट्रव्यापी खुला फुटबल प्रतियोगिताको च्याम्पियन बनेकाे छ ।

दुई पल्टको च्याम्पियन बेशीशहर युथ सोसाइटी सेरा लमजुङलाई १–० ले पराजित गर्दै लाली गुराँसले उपाधि जित्न सफल भएको हो । लाली गुरासँ १९ वर्षपछि त्रिवेणी कपको च्याम्पियन बनेको हो । यसअघि लाली गुराँसले वि.स. २०६१ मा उपाधि जितेको थियो ।

लमजुङको बेसिशहर नगरपालिका– ७ को सहजीस्थित त्रिवेणी रंगशालामा शनिबार भएको फाइनलमा लाली गुराँसलाई च्याम्पियन बनाउन दोस्रो हाफमा भएको आत्मघाती गोल नै निर्णाय बन्यो ।

उनले ६०औं मिनेटमा आन्द्रेस नियाले आत्मघाती गोल गर्न पुगेका थिए । । सिमन्त थापाको लामो थ्रु बललाई क्लियर गर्ने क्रममा आन्द्रेस नियाको हेडरले आफ्नै पोस्टको जाली चुम्न पुगेको थियो ।

अन्तत त्यही गोल नै लाली गुराँसलाई उपाधि जित्न पर्याप्त रह्यो । प्रतिस्पर्धात्मक बनेको फाइनलमा दुवै टोलीमा ‘ए’ डिभिजन र गत साता सम्पन्न नेपाल सुपर लिग (एनएसएल) खेलेका खेलाडीको बाहुल्यता रहेको थियो ।

उपाधिसँगै लाली गुरासँले ८ लाख रुपैयाँसहित ट्रफी मेडल र प्रमाण पत्र हात पारेको छ । दोस्रो भएको बेसीशहरदे ४ लाख रुपैयाँसहित ट्रफी, मेडल र प्रमाण पत्र पाएको छ । सेमिफाइनलमा पराजित दुई टोली अभिषेक चर्च रजहर नवलपुर र लाङ्दी देवी युवा क्लब नाल्माले समान १ लाख रुपैयाँ हात पारेको छ ।

बेशीशहर युथ सोसाइटीका लक्षु थापा मगर सर्वाेत्कृष्ट खेलाडी चुनिए ।सुन्दर बजार फुटबल क्लबका एरोन थापा सर्वाधिक गोलकर्ता बने । उनले प्रतियोगिताभर एक ह्याट्रिकसहित चार गोल गरेका थिए । उनीहरुले ट्रफीसँगै समान २० हजार रुपैयाँ हात पारे ।

विजयी टोली तथा खेलाडीलाई गण्डकी प्रदेशका मुख्य मन्त्री सुरेन्द्र राज पाण्डे, गण्डकी प्रदेश सभा सदस्य भेष बहादुर पौडेल, बेशीशहर नगरपालिकाका नगर प्रमुख गुमान सिंह अर्याल र क्लबका अध्यक्ष राज कुमार घिमिरेलगायतले पुरस्कृत गरे ।

त्रिवेणी युवा क्लब लमजुङको आयोजनामा १२ पुसबाट सुरु भएको प्रतियोगितामा विभिन्न २१ टोलीको सहभागिता रहेको थियो । गत वर्ष रोड्स् क्लब रामपुर चितवनले उपाधि जितेको थियो । यसपल्ट विभगीय टोली त्रिभुवन आर्मी क्लबसँगै नेपाल पुलिस क्लब र बेलायतको क्वीन्स गोर्खाज टोलीको सहभागिता रहेको थियो ।