पोखरा (हाम्रो खेलकुद )– सिएमजी क्लब संकटा र बंगलादेशको नारायणगज एफसीबीच आज १५ औं आहा रारा गोल्डकप फुटबल प्रतियोगिताको अन्तिम क्वार्टरफाइनल खेल हुँदैछ । संकटा विभागिय टोलीलाई २–१ ले हराउँदै अन्तिम आठमा पुगेको थियो भने नारायगज सोझै क्वार्टरफाइनल खेल्दैछ ।

नारायणगज टोली काठमाडौं हुँदै सोमबार रातीमात्र पोखरा आइपुगेको छ । पूर्व निर्धारित बंगलादेशको प्राराजगज स्र्पोर्टिङ क्लबले अन्तिम समयमा प्राविधिक कारण देखाउँदै भाग नलिने जनाएपछि बंगलादेशकै अर्को टोली पोखरा पुगेको हो । संकटा तेस्रो पटकको सहभागितामा पनि क्वार्टरफाइनल पुग्न सफल भएको थियो ।

यो बर्ष चितवन विकास रनिङ शिल्ड जितेको संकटा गत सातामात्र सुदूरपश्चिमाञ्चल खप्तड गोल्डकपको फाइनल खेलेर पोखरा आइपुगेको छ । यद्दपी टोलीले काँकरभिट्टा गोल्डकप र हेटौंडामा उच्च प्रदर्शन गर्न सकेन । संकटा तीन बर्षपछि आहा खेल्न आएको हो । यसअघिका दुई सहभागितामा टोली क्वार्टरफाइनल भन्दा अघि बढ्न सकेको छैन ।

२०६१ मा पहिलो र २०७० मा दोस्रो पटक सहभागि भएको संकटा दुवै पटक क्वार्टरफाइनलमा मनाङसँग पराजित भएर राजधानी फर्केको थियो । पहिलो सहभागितामा धरानलाई र दोस्रो सहभागितामा जावालखेललाई हराउँदै संकटा अन्तिम आठमा पुगेको थियो ।

आजको खेल जितेमा संकटाले माघ १३ गते फेरी एकपटक लक्ष्मी हुन्डाई मनाङ मस्र्याङ्दीको सामना गर्नुपर्ने हुन्छ । केही दिनअघि मात्र संकटालाई १–० ले हराउँदै मनाङले सुदूरपश्चिमाञ्चल खप्तड गोल्डकप जितेको थियो ।