काठमाडौं (हाम्रो खेलकुद) – वीरगन्ज युनाइटेड एफसी र पुछारमा रहेको बुटवल लुम्बिनी एफसीबीच जारी नेपाल सुपर लिगको खेलको पहिलो हाफ गोलरहित बराबरीमा सकिएको छ ।

प्लेअफमा पुग्नका लागि जित्नै पर्ने खेलमा वीरगन्जले पटक पटक पाएको अवसर सदुपयोग गर्न सकेको छैन । बुटवलले भने निकै कम आक्रमणको अवसर सिर्जना गरेको छ ।

१०औं मिनेटमा बुटवलका जिलेस्पी जंग कार्कीको प्रहार डिफ्लेक्ट भएर बाहिरियो । ११औं मिनेटमा वीरगन्जका ओवेदको बक्स बाहिरबाट लिएको प्रहार पोस्टको दिशामा गएन ।

१५औं मिनेटमा जिलेस्पीको क्रस दीप कार्कीले सहजै समाते । त्यसपछिको मिनेटमा वीरगन्जको एउटा पेनलाटी अपीलमा रेफ्रीले पेनाल्टी दिएनन् । आन्द्रे बियिकको ब्याक पास राम्रो नभएपछि उनले विलियम ओपोकुलाई लडाएका थिए तर रेफ्रीले पेनाल्टी दिएनन् ।

२५औं मिनेटमा सुशील लामाको कर्नर मोहम्मडुले समात्न नसकेपनि रेफ्रीले फाउल दिएपछि खतरा टर्यो । ३०औं मिनेटमा सुशील लामाको प्रहार बक्स भित्र ब्लक हुन पुग्यो ।

३६औं मिनेटमा दीपले राम्रो बचाउ गर्दै बुटवललाई अगाडि जानुबाट रोके । उनले बहका बाहिरबाट लिएको प्रहार दीपले आफ्नो बायाँतर्फ डाइभ गरेर राम्रो बचाउ गरे ।

पहिलो हाफको थपिएको समयमा जिलेस्पीको क्रस नियन्त्रणमा लिएर आशिष लामाले पोस्टको निकै टाढा प्रहार गरे । पोस्टको निकै नजिकबाट उनले प्रहार गरेको भली निकै टाढाबाट बाहिरिएको हो ।

७ खेलमा ८ अंकसहित सातौं स्थान रहेको वीरगन्ज आज जित हासिल गर्न सके तेस्रो स्थानमा उक्लिदै प्लेअफमा आफ्नो स्थान सुरक्षित गर्नेछ । ७ खेलमा ७ अंक सहित पुछारमा रहेको बुटवल भने अन्तिम स्थानबाट उक्लिन चाहन्छ ।