काठमाडौं (हाम्रो खेलकुद) – नेपाल सुपर लिग (हाम्रो खेलकुद) मा काठमाडौं रेजर्स र वीरगन्ज युनाइटेड एफसी बीच बिहीबार जारी खेलको मध्यान्तर १-१ को बराबरीमा सकिएको छ ।

दशरथ रंगशालामा दुई पेनाल्टी भएको पहिलो हाफमा काठमाडौंका लागि एन्केन्ग्वे जुनियरले गोल गरेका हुन् भने वीरगन्जका लागि विलियम ओपोकुले गोल गरेका हुन् ।

तेस्रो मिनेटमा काठमाडौंका तोजिदिनोभको बक्स बाहिरबाट गरेको प्रहार पोस्टको निकै टाढाबाट बाहिरियो । पाँचौं मिनेटमा काठमाडौंकै किंगे ओलिभरको लामो बलमा तोजीदिनोभ पुग्नु अघि दीप कार्की गोल लाईन अघि आएर समाते ।

२०औं मिनेटमा काठमाडौँले खेलमा अग्रता लियो । कुलदीप कार्कीको क्रस हिसुब थपलियाले नियन्त्रणमा लिन नसकेपछि तेज तामाङले क्लियर गर्ने क्रममा एन्केन्ग्वे जुनियरको सामु पुगेपछि उनले सहज गोल गर्दै खेलमा काठमाडौंलाई अग्रता दिलाए ।

२७औं मिनेटमा वीरगन्जका ओवेद ओसुवुले टाढाबाट गरेको प्रहार सिधै काठमाडौं गोलरक्षक एन्जल श्रेष्ठको हातमा जान पुग्यो । ३०औं मिनेटमा तोजीदिनोभको कर्नरमा शोखरुखको फ्रि हेडर पोस्टको दिशामा जान सकेन ।

३७औं मिनेटमा काठमाडौंले अग्रता दोब्बर गर्ने सुनौलो अवसर पायो । दिपेन्क राज सिंह ठकुरीले बक्स भित्रबाट हिसुबमाथि फाउल गरेपछि काठमाडौंले पेनाल्टी पाएको थियो । तर शोखरुखको पेनाल्टी दीप कार्कीले बचाउन पुगे ।

उता पहिलो हाफको अन्त्यतिर वीरगन्जले पनि पेनाल्टीमार्फत गोल गर्ने अवसर प्राप्त गर्यो । सुशिल लामाको प्रहारमा आन्द्रेस नियाले हेड गरेको बल रेफ्रीले ह्यान्डबल दिएपछि वीरगन्जले पेनाल्टी पाएको थियो । पेनाल्टीमा विलियम ओपोकुले गोल गर्दै खेल बराबरीमा ल्याए ।

काठमाडौं प्लेअफमा पुग्ने सम्भावना बलियो बनाउन आज जित्ने दाउमा छ । वीरगन्जलाई पनि सो सम्भावना जीवितै राख्न आज जित्नै पर्ने दबाब छ । आज जित हासिल गर्न नसकेमा वीरगन्ज शीर्ष चार दौडबाट बाहिरिने छ ।

काठमाडौं ६ खेलमा ९ अंकसहित चौथो स्थानमा रहँदा वीरगन्ज ६ खेलमा ५ अंकसहित पुछारमा छ ।

एनएसएलमा लिग तालिकाको शीर्ष २ टोलीले सिधै फाइनलमा छनोट हुने क्वालिफायर खेल खेल्नेछन् । क्वालिफायरमा पराजित हुने टोलीले भने लिगको तेस्रो र चौथो स्थान प्राप्त गर्ने टोलीको विजेतासँग अर्को क्वालिफायर खेल्न पाउनेछ ।