काठमाडौं (हाम्रो खेलकुद) – दोस्रो संस्करणको नेपाल सुपर लिग अन्तर्गत दशरथ रंगशालामा जारी झापा एफसी र धनगढी एफसी बीचको खेल मध्यान्तर सम्म गोलरहित बराबरीमा सकिएको छ ।

पहिलो मिनेट देखि नै रोमाञ्चक देखिएको खेलमा दुवै टोलीबाट धेरै अवसरहरू सिर्जना भएतापनि गोल भने आउन सकेको छैन ।

झापाले पहिलो १५ सेकेन्ड भित्र नै गोल गर्ने अवसर खेरा फाल्यो । रोहन कार्कीले सुरूवातमै बल गुमाएपछि प्रशान्त लक्समले दिएको पासमा स्ट्राइकर जोर्गे सान्चेजले वान अन वान अवसरमा पोस्टको बाहिर प्रहार गरे ।

तेस्रो मिनेटमा धनगढीका अहमद हिजाजीले पोस्टको केही माथि प्रहार गर्न पुगे । आशिष चौधरीको प्रहार नियन्त्रणमा लिएर झापाका दुई डिफेन्डर बिट गर्दै उनले गरेको प्रहार पोस्टको माथिबाट बाहिरियो ।

आठौं मिनेटमा धनगढीका अभिषेक गुरुङले बक्स बाहिरबाट गरेको प्रहार कुपिचले समाते । २०औं मिनेटमा रामचन्द्र वाजीको पासमा हिजाजीले कुपिचलाई पुनः बचाउ गर्न बाध्य बनाए । २२औं मिनेटमा कमल श्रेष्ठको फ्रिकिक पनि कुपिचले पन्च गरिदिए ।

२४औं मिनेटमा सान्चेजले अर्को राम्रो अवसर खेरा फाले । लक्ष्मण रूचालको पासमा उनको बल नियन्त्रण राम्रो नरहेपछि धनगढी गोलरक्षक मोहम्मद ताहाले लाइन अगाडि आउने अवसर प्राप्त गरे र सान्चेजको प्रहार बचाए ।

३०औं मिनेटमा समन्दर ओचिलोभको फ्रिकिक पोस्टको केही टाढाबाट बाहिरियो । ३३औं मिनेटमा प्रशान्त लक्समले बक्स बाहिरबाट पोस्ट माथि प्रहार गरे । ४१औं मिनेटमा सान्चेजको प्रहार ताहाले बचाए ।

अपराजित धनगढीले आज जित निकाल्न सकेमा प्लेअफमा आफ्नो स्थान पक्का गर्ने छ । दोस्रो स्थानमा रहेको धनगढीको ६ खेलमा १२ अंक रहेको छ । झापालाई पनि प्लेअफको संभावना जीवित राख्न जित्नै पर्ने दवाव छ । झापाको समान ६ खेलमा ७ अंक रहेको छ ।