काठमाडौं (हाम्रो खेलकुद)– पूर्व महासचिव इन्द्रमान तुलाधरको अखिल नेपाल फुटबल संघ (एन्फा) प्रवेशले औपचारिकता पाएको छ । उनले यसपटक सिइओको जिम्मेवारीमा एन्फामा पुनरामगन गरेका हुन् ।

तुलाधरले मंगलबार सातदोाबाटोस्थित एन्फा पुगेर नियुक्त पत्र बुझे । एन्फा कार्यसमितिको सोमबार बसेको बैठकले बहुमतका आधारमा पूर्व महासचिव समेत रहेका तुलाधरलाई सिईओ नियुक्त गरेको थियो । एन्फा महासचिव किरण राईले तुलाधरलाई सिइओको पत्र हस्तान्तरण गरेको एन्फालेल जनाएको छ । विगतमा पनि तुलाधर लामो समय एन्फा सिईओ रहेका थिए ।

गत वर्ष कर्मा छिरिङ शेर्पा एन्फा अध्यक्षमा पराजित भएपछि तुलाधर एन्फाबाट अलग भएका थिए । तुलाधरले गत वर्ष असारमा भएको निर्वाचनमा शेर्पा समूहलाई सघाएका थिए । डेढ वर्षपछि वर्तमान अध्यक्षा पंकजविक्रम नेम्वाङ सघाउन आफू तयार रहेको भन्दै शनिबार पत्रकार सम्मेलनमार्फत जानकारी गराएका थिए ।

कात्तिक २३ गते हेटौंडमा भएको विशेष साधारण सभाले एउटा म्यान्डेड दिइसकेको र अब त्यसलाई सबैले माने अघि बढ्नु पर्ने तर्क तुलाधरले गरेका थिए । तुलाधरले, शेर्पा र अन्य ए,बी,सी डिभिजनसँग मिलेर भदौ २५ गते अध्यक्ष नेम्वाङ र महासचिव राईविरुद्ध अविश्वासको प्रस्ताव दर्ता गराएका थिए ।

तुलाधरले नियुक्त पत्र बुझेकै दिन एन्फाका वरिष्ठ उपाध्यक्ष वीरबहादुर खड्काको नेतृत्वमा कार्यसमितिका ९ जनाले निर्णयको विधान विपरित भएको भन्दै पत्रकार सम्मेलनमार्फत विरोध गरेका थिए । उनीहरुले तुलाधरको नियुक्तीविरुद्ध अनुशासन समिति, राखेप, मन्त्रालय र त्यहाँबाट पनि नभए अदालत सम्म जाने बताएका छन् । ए डिभिजन टोली संकटा क्लबका अध्यक्ष समेत रहेका तुलाधरको नियुक्ती पहिलो पटक एन्फा भित्रै विवादमा परेको छ ।