काठमाडौं (हाम्रो खेलकुद) – दोस्रो संस्करणको नेपाल सुपर लिग अन्तर्गतको दशरथ रंगशालामा जारी खेलमा बुटवल लुम्बिनी एफसी र पोखरा थन्डर्सले गोलरहित पहिलो हाफ खेलेका छन् ।

दुवै टोलीबाट धेरै मौका बन्न नसकेको पहिलो हाफमा गोल पनि आउन सकेन । चौथो मिनेटमा बुटवलका स्टेफन बिनोङको प्रहार बक्स भित्रबाट ब्लक हुन पुग्यो । छैठौं मिनेटमा बुटवल कप्तान एरिक विष्टको फ्रिकिक सिधै पोखरा गोलरक्षक यभ्स प्रिसोको हातमा जान पुग्यो ।

आठौं मिनेटमा जिलेस्पी जंग कार्कीले बक्स बाहिरबाट गरेको भली प्रहार प्रिसोलाई बचाउन असजिलो भएपनि बचाउन सफल भए । २० औं मिनेटमा निराजन धामीको क्रसमा स्टेफेन बिनोङको हेडर क्रसबारभन्दा थोरै माथिबाट गयो ।

२५औं मिनेटमा सुरज जिउ ठकुरीको फ्रिकिकमा फ्रान्कलिन टाल्लाको हेडर पोस्टको केही परबाट बाहिरियो । त्यसको तीन मिनेट पछि पासाङ लामाको क्रसमा बिनोङको हेडर पुनः पोस्ट माथिबाट बाहिरियो ।

३३औं मिनेटमा मोसेस ग्याबाको प्रहार सिधै बुटवल गाेलरक्षक मोहम्मडुमको हातमा गयो । ४४औं मिनेटमा सुरजको कर्नरमा दिनेश राजवंशीको हेडर टाल्लाको प्रहार डिफ्लेक्ट भएर बाहिर जान पुग्यो ।

थपिएको समयमा दिपेश आले मगरको बक्स बाहिरबाट लिएको प्रहार मोहम्मडुको हातमा पुग्यो । त्यसपश्चात स्टेफन अन्नोरको बक्स बाहिरबाट लिएको भली पनि पोस्टको दिशामा जान सकेन ।

बुटवल ६ खेलमा ७ अंक सहित सातौं स्थानमा रहँदा पोखरा भने ६ खेलमा ११ अंकसहित दोस्रो स्थानमा छ । आज जित हासिल गर्न सके पोखरा पहिलो स्थानमा उक्लिने छ ।