काठमाडौं (हाम्रो खेलकुद) – नेपाल सुपर लिग २ अन्तर्गत मंगलबारको पहिलो खेलमा स्पोर्टिङ इलाम र ललितपुर सिटी फुटबल क्लबबीच पहिलो हाफ गोलरहित बराबरीमा सकिएको छ ।

दशरथ रंगशालामा ललितपुरले तुलनात्मक रुपमा बढी आक्रमण गरेपनि अग्रता लिन भने सकेको छैन । गोलरक्षक विकेश कुथु लगातार परिक्षण हुँदा उनले केहि राम्रो बचाउ पनि गरेका छन् । इलामले भने खासै अवसर सिर्जना गर्न सकेको छैन ।

खेलको चौथो मिनेटमा ललितपुरले गोल गर्ने अवसर सदुपयोग गर्न सकेन । गोलरक्षक विकेश कुथु पोजिसनबाहिर रहेको अवस्थामा सेसेहाङ आङदेम्बेले झन्डै २५ यार्ड टाढाबाट गरेको प्रहार डिफेन्डर विमल पाण्डेले छेक्दै अघि जान दिएनन् । लगत्तै त्यसपछि मिडफिल्डर विवेक पौडेलले चोट बोक्दा ललितपुरले उनको स्थानमा रोशन पहारीलाई मैदान पठाएक थियो ।

खेलको २३ औं मिनेटमा कप्तान विकेशले उत्कृष्ट बचाउ गर्दै खेललाई गोलरहित नै राखे । दिनेश हेन्जनले पेनाल्टी क्षेत्र भित्रबाट गरेको प्रहार विकेशले आफ्नो दायाँतर्फ डाइभ दिँदै बाहिर पठाए । त्यसपछि कर्नरबाट आएको रिबाउन्डमा अनन्त तामाङको अन्तिम प्रहार पनि विकेशको हातमा पुग्यो ।

३७ औं मिनेटमा ललितपुरको अग्रतासामु क्रसबार बाधक बन्यो । अनन्त तामाङले मैदानको मध्यभाग नजिकबाट गोलरक्षक विकेश अघि रहेको अवस्थामा छिटो लिएको फ्रिकिक क्रसबारमा लाग्यो । विकेशले अन्तिम समयमा हातले बल छुँदै बललाई क्रसबारतर्फ पठाएका थिए ।

इलाम प्रतियोगिताको प्लेअफ दौडबाट बाहिरिएको छ । ललितपुर भने आजको जितले शीर्षस्थानमा उक्लनेछ ।