काठमाडौं (हाम्रो खेलकुद) – दोस्रो संस्करणको नेपाल सुपर लिग अन्तर्गत दशरथ रंगशालामा जारी खेलमा काठमाडौं रेजर्स विरुद्ध धनगढी एफसीले मध्यान्तर सम्म अग्रता बनाएको छ । धनगढीका लागि अहमद हिजाजीले गोल गर्दै १-० को अग्रता बनाएका हुन् ।

पछिल्लो संस्करणका शीर्ष दुई टोली यसपटक पनि राम्रै लयमा छन् । खेलको मध्यान्तर सम्म दुवै टोलीले मौकाहरु बनाउन सफल भएपनि धनगढीले मात्र मौकाको सदुपयोग गर्न सफल भएको छ

१५औं मिनेटमा धनगढीले खेलमा अग्रता लिन सफल भयो । फलु डियाग्नेको क्लियर गरेको बल काठमाडौंका आन्द्रेस नियाले किपरलाई पास दिन खिन्दा अहमद हिजाजीले बलमा पुगेर किपर एन्जल श्रेष्ठ माथि चिप गर्दै अग्रता दिलाए ।

अर्को मिनेटमा नै काठमाडौँले बराबरी गर्ने मौका खेरा फाल्यो र धनगढीले राहतको सास फेर्यो । तोजीदिनोभको क्रस देवेन्द्र तामाङले क्लियर गर्न नसकेपछि बल क्रसबारमा लागेर फर्कियो र प्रशान्त अवस्थीको खुट्टामा पुग्यो । उनले सिक्स यार्ड बक्सको छेउ बाट बललाई पोस्टको माथि प्रहार गरे ।

२०औं मिनेटमा काठमाडौँका मार्की हिसुब थपलियाको प्रहार टिकेन्द्र सिंह थापाले बचाए । २३औं मिनेटमा तोजीदिनोभको फ्रिकिक सिधै वालमा लागेर फर्कियो ।३०औं मिनेटमा उनकै बक्स बाहिरबाट लिएको प्रहार डिफ्लेक्ट भएर पोस्ट बाहिर जान पुग्यो ।

पहिलो हाफको अन्तिम समय तिर फलु डियाग्नेको फ्रिकिक वालमा लागेर ओलावालेको खुट्टामा पुगेपछि उनले हिजाजीको लागि खेलेको पासमा हिजाजीको प्रहार एन्जलले बचाउ गरे ।

त्यसबाहेक पहिलो हाफमा स्पष्ट अवसरहरु कुनै टोलीले सिर्जना गर्न सकेन ।

धनगढी अहिलेसम्म अपराजित रहँदै ५ खेलमा ११ अंक जोड्दै पहिलो स्थानमा छ । काठमाडौं भने ५ खेलमा ८ अंक सहित चौथो स्थानमा छ ।