काठमाडौं(हाम्रो खेलकुद) – नेपाल सुपर लिग (एनएसएल ) मा बिहीबार एफसी चितवन र धनगढी एफसीबीच खेल हुनेछ। त्रिपुरेश्वरस्थित दशरथ रंगशालामा खेल साँझ ५:०० बजे सुरु हुनेछ।

एनएसएलमा अपराजित दुई टोलीमध्ये एक धनगढी ४ खेलमा ८ अंक जोडेर तालिकाको दोस्रो स्थानमा छ। ५ खेलबाट जम्मा ५ अंक जोडेको चितवन आठौं स्थानमा छ ।

साविक उपविजेता धनगढीले सुरुवातमा खेल जितेको थियो । ती दुबै खेलको अन्तिम तिर गोल गर्दै धनगढीले जित निकालेको थियो। त्यसपछि ललितपुर सिटी एफसीसँग गोलरहित बराबरी खेलेको धनगढीले पछिल्लो खेलमा इलाम विरुद्ध २ गोलले पछि परेको अवस्था उल्ट्याउदै बराबरी गरेको थियो।

धनगढीका विदेशी गोलकिपर मोहम्मद ताहाले इलामसँगको खेलमा बिर्सनलायक प्रदर्शन गरेका थिए । धनगढीका अन्य विदेशी खेलाडीले भने राम्रो छाप छोडेका छन् ।
नेपाली फुटबलका नियमित स्ट्राइकर अफिज ओलावालेले अहिलेसम्म २ खेल मात्रै सुरुवाती ११ मा रहेर खेले । २ खेल वैकल्पिक खेलाडीका रुपमा खेले। उनले बेन्चबाट गएका दुबै खेलमा गोल गरेका छन् ।

चितवनले १ जित, २ बराबरी र २ खेलमा हार बेहोरेको छ । चितवनको दुबै बराबरी भने खेलको अन्तिम समयमा गोल खाएर भएको थियो । टोलीलाई खेलको अन्त्यतिर सम्हालिन कठिन देखिदै आएको छ। अघिल्लो खेलमा ललितपुर विरुद्ध पराजित चितवनले धनगढीलाई हराउन सकेको खण्डमा प्लेअफको सम्भावना रहन्छ । ललितपुरविरुद्ध रातो कार्ड पाएका चितवनका उत्सव राई आज टोलीमा हुने छैनन् ।