काठमाडौं (हाम्रो खेलकुद) – जोर्गे सान्चेजको गोलमा झापा एफसीले नेपाल सुपर लिग (एनएसएल) मा मंगलबार जारी खेलको मध्यान्तर सम्म एफसी बुटवल लुम्बिनी विरुद्ध १-० को अग्रता बनाएको छ ।

अन्जन विष्टको पासमा ३९औं मिनेटमा गोल गर्दै सान्चेजले झापालाई अग्रता दिलाएका हुन् ।

चोटका कारण पछिल्लो दुई खेल गुमाएका झापाका कप्तान अन्जन विष्ट आज सुरुवाती ११ मा फर्किएका छन् । झापाका युवा डिफेन्डर योगेश गुरुङ पछिल्लो खेलमा रातो कार्ड खाँदै आजको खेलका लागि निलम्बित भएका कारण टोलीमा छैनन् । उनको स्थान विशाल बस्नेतले लिएका छन् ।

खेलमा दुबै टोलीबाट मौकाहरु बनेका छन् । तर झापाले नै बुटवल गोलरक्षक मोहम्मडु लाई व्यस्त राखेको थियो । झापाका कुपिचले भने धेरै समस्या झेल्न परेको छैन ।

चौथो मिनेटमा झापाका सान्चेज बक्समा लडेपछि पेनाल्टीको अपिल गरेका थिए तर रेफ्रीले पेनाल्टी दिएनन् । सोही अपिल पछिको काउन्टरमा स्टेफन बिनोङको पासमा आशिष लामाको प्रहार सुमित श्रेष्ठले ब्लक गरे ।

आठौं मिनेटमा झापाका लक्ष्मण रुचालको पासमा सुमितले गरेको क्रसमा सान्चेजले चाहेजस्तो प्रहार गर्न सकेनन् । सोही मिनेटमा सान्चेजको बायाँ खुट्टाले गरेको प्रहार मोहम्मडुले बचाए ।

१२औं मिनेटमा झापाका लक्ष्मणले बक्स बाहिरबाट गरेको प्रहार पोस्टको निकै बाहिर जान पुग्यो । बक्सको बायाँ पट्टी पासको आस गरिरहेका अन्जन केही उत्तेजित देखिएका थिए ।

१३औं मिनेटमा झापालाई गाेलपोस्टले बचायो । सरोज तामाङको क्रस बिनोङले नियन्त्रण गर्न खोज्दा सर्ज सङको खुट्टामा पुग्यो । उनको प्रहार पोस्टमा लागेर फर्कियो। रिबाउन्डमा उनको प्रहारलाई कुपिचले बचाए ।

१७औं मिनेटमा प्रशान्त लक्समले बक्स बाहिर बाट प्रहार गर्दा पुनः अन्जन खुसी देखिएनन् ।

२०औं मिनेटमा झापाले ठूलो अवसर गुमाउन पुग्यो । अन्जनको बक्स बाहिरबाट लिएको प्रहार मोहम्मडुले बचाएपछि लक्ष्मणले रिबाउन्डमा सहज मौकामा पोस्टको बाहिर प्रहार गरे ।

२३औं मिनेटमा झापाका छिरिङ गुरुङको क्रसमा। सान्चेजले नियन्त्रणमा लिएर गरेको प्रहार मोहम्मडुले बचाउन पुगे । २४औं मिनेटमा लक्ष्मणको क्रसमा अन्जनको हेडर प्रयासले पोस्टको दिशा लिन सकेन ।

३४औं मिनेटमा सरोजको फ्रिकिकले कुपिचलाई दुःख दिन सकेन । ३६औं मिनेटमा सरोजकै ट्याकलमा अन्जन बक्समा लडेपछि पेनाल्टीको अपील गरेका थिए । तर रेफ्री सुरोजित दासले अन्जनलाई नै पहेँलो कार्ड देखाए ।

३९औं मिनेटमा भने झापाले अग्रता लियो । धेरै आलोचना खेपेका सान्चेजले अन्जनले पासमा गोल गर्दै खेलमा झापालाई अग्रता दिलाए । पाँचौं खेलमा यो उनको पहिलो गोल समेत हो ।

झापा अहिलेसम्म खेलेको ४ खेलमा जितविहिन छ र ३ अंक सहित आठौं स्थानमा छ । बुटवल भने ५ खेलमा ७ अंकसहित पाँचौं स्थानमा छ ।