काठमाडौं (हाम्रो खेलकुद) – दुई महिना पछि सुरु हुने एएफसी एसियन कप छनोटअन्तर्गत समूह विभाजनको ड्रमा भाग लिन नेपाली राष्ट्रिय फुटबल टोलीका जापानी प्रशिक्षक ग्योतुको कोजी आइतबार नै संयुक्त अरब इमिरेट्स (युएई) को अबुधाबी पुगिसकेको छन् । ड्र सोमबार हुँदैछ ।

एएफसी सोलिडारिटी कपको विजेता रहेको नेपालले छनोटमा ग्वामको सहभागिता नहुने भएपछि त्यो ठाँउमा मौका पाएको थियो । नेपाल जस्तै सोलिडारिटी कपको फाइनल पुगेको मकाउनले पनि कुवेतको सट्टा छनोट खेल्ने अवसर पाएको छ । एसियन कप छनोट चैत १० गतेबाट सुरु हुनेछ ।
एसियन कप छनोट खेल्ने २४ टोलीलाई फिफा वरियताको आधारमा चार पटमा विभाजन गरिएको छ । प्रत्येक पटमा ६ राष्ट्र रहेका छन् । २४ टोलीलाई ६ समूहमा विभाजन गरिने छ । समूह चरणको खेलपछि समूहको शीर्ष दुईमा पर्ने टोलीले दुई बर्षपछि हुने एसियन कपमा प्रतिस्पर्धा गर्न पाउनेछन् । नेपालसहित पट ‘डी’ मा मकाउ, भुटान, मलेसिया, कम्बोडिया र सिंगापुर छन् ।

पट ‘ए’ मा जोर्डन, ओमान, फिलिपिन्स, बहराइन, किर्गिस्तान र उत्तर कोरिया छन् । भारत, प्यालेस्टाइन, भियतनाम, ताजिकिस्तान, हङकङ र तुर्कमिनिस्तान पट ‘बीमा छन् । त्यस्तै पट ‘सीमा माल्दिभ्स,यमन, लेबनान, अफगानिस्तान, चाइनिज ताइपे र म्यानमार छन् । प्रत्येक पटबाट अलग छ समूहमा १/१ टोली पर्नेछन् ।