लन्डन (एजेन्सी)– रेलिगेसन क्षेत्रमा रहेको हल सिटीलाई सोमबार २–० ले हराउँदै शीर्षस्थानको चेल्सीले प्रिमियर लिगमा अंक अन्तरलाई अझै बढाएको छ । दुई हाफमा एक एक गोल गर्दै चेल्सीले हलमाथि जित हासिल गरेको थियो ।

चोटका कारण अघिल्लो साता लेस्टरसँगको खेल गुमाएका डिएगो कोस्टाले पुनरागमन गरेको खेलमा पहिलो गोल गरेका थिए । पहिलो हाफको इन्जुरी समयको सातौं मिनेटमा मोसेसको क्रसमा उनले गोल गरेका थिए । चेल्सीको अग्रता जोगाइराख्न गोलकिपर थिबाउट कार्टोइसको भूमिका महत्वपूर्ण रह्यो । उनले ह्यारी माग्युरी, डेभिड मेलेर र उमार नियासीको प्रहारलाई रोकेका थिए ।

तर, ग्यारी काहिलले खेल सकिन ९ मिनेटअघि हेडमार्फत गोल गरेपछि चेल्सीको जित सहज बनेको थियो । सेस फाब्रिगासको फ्रिकिकमा नजिकबाट काहिलले गोल गरेका थिए । जितपछि दोस्रो स्थानको आर्सनललाई चेल्सीले ८ अंकले पछि पारेको छ । १६ अंक जोडेको हल सिटी अंक तालिकाको पुछारबाट दोस्रो स्थानमा छ ।

चेल्सीको जित अघि आइतबार आर्सेनलले इन्जुरी समयको आठौं मिनेटमा पेनाल्टीमा गोल गर्दै बर्नलीमाथि २–१ ले जित निकालेको थियो । इन्जुरी समयमा दुई गोल भएको खेल आर्सनलले दस खेलाडीमा सिमित हुँदै अन्त्य गरेको थियो । लाउरेन्ट कोसिन्लेलाई पेनाल्टी बक्समा बेन मिले फाउल हानेपछि इन्जुरीको आठौं मिनेटमा आर्सनलले पेनाल्टी पाएको थियो । एलेक्स सान्चेजले पेनाल्टीमा गोल गर्दै आर्सनललाई जित दिलाए ।

त्यसअघि इन्जुरी समयको तेस्रो मिनेटमा आन्द्रे गेरीले पेनाल्टीमा बर्नलीका लागि बराबरी गोल गरेका थिए । मेसुट ओजिलको कर्नरमा सोर्डान मुस्तफीले हेड गोल गर्दै आर्सनललाई ५९ औं मिनेटमा अग्रता दिलाएका थिए । ६५ औं मिनेट ग्रेनिट झाकाले रातो कार्ड पाएपछि आर्सनल दस खेलाडीमा सिमित भएको थियो । २२ खेलमा आर्सनलको ४७ अंक पुगेको छ भने शीर्षस्थानको चेल्सीको ५५ अंक छ ।
आइतबार नै अर्को खेलमा चार खेलको लगातारको हारको श्रृखंलालाई टुंगाउने क्रममा साउथ ह्याम्टनले साविक विजेता लेस्टर सिटीलाई ३–० ले हरायो । जेम्स वर्ड प्रोसेले २६ औं मिनेटमा पहिलो गोल गरे भने अर्को गोल ३९ औं मिनेटमा जाय रोड्रिग्युजले गरे । टोलीका लागि डुसान टाडिकले खेल सकिन ४ मिनेटअघि तेस्रो गोल गरेका थिए ।