एजेन्सी – क्याटलान क्लब बार्सिलोनालाई पराजित गर्दै यो सिजन उच्च प्रदर्शन गरिरहेको जिरोना स्पेनिस ला लिगाको शीर्षस्थानमा उक्लिएको छ ।

रोमाञ्चक र प्रतिस्पर्धात्मक बनेको खेलमा बार्सिलोनालाई उसकै मैदानमा ४–२ ले पराजित गरेपछि रियल म्याड्रिडलाई पछि पार्दै जिरोना ला लिगाको शीर्षस्थानमा उक्लन सफल भएको हो ।

रोमाञ्चक र प्रतिस्पर्धात्मक बनेको खेलमा बार्सिलोनालाई उसकै मैदानमा ४–२ ले पराजित गरेपछि रियल म्याड्रिडलाई पछि पार्दै जिरोना ला लिगाको शीर्षस्थानमा उक्लन सफल भएको हो ।

जिरोनाको जितमा अर्टिम डोभेक, मिगुइल गुइटेरेज, भालेरी फर्नान्डेज र क्रिष्टियन स्टुएनीले गोल गरे । बार्सिलोनाका रोबर्ट लेवान्डोस्की र इल्केए गुन्डोगानले गोल फर्काए ।

बार्सिलोनाको मैदान स्टडि ओलिमपिक लुइस कम्पनीमा आइतबार राति भएको खेलमा घरेलु टोली खेलको १२औं मिनेटमा पछि परेको थियो । अर्टिम डोभेकले भिक्टरको पासमा गोल गर्दै जिरोनालाई अग्रता दिलाए ।

तर, जिरोनाको त्यो अग्रता लामो समय टिकेन । १९औं मिनेटमा रोवर्ट लेवान्डोस्कीले गोल गर्दै खेललाई १–१ गोलको बराबरीमा ल्याए । उनले राफिन्हाको पासमा गोल गर्न सफल भएका थिए ।

४०औं मिनेटमा मिगुइल गुइटेरेजले गोल गर्दै जिरोनालाई पहिलो हाफमा २–१ को अग्रता दिलाए । उनले इभान मार्टिनको पासलाई सदुपयोग गरे । ८०औं मिनेटमा भालेरी फर्नान्डेजले गोल गरेपछि जिरोना जिततर्फ अग्रसर बन्यो ।

इन्ज्युरी समयको थप गरिएको तेस्रो मिनेटमा इल्केए गुन्डोगानले फेरान टोरेसको पासमा गोल गर्दै बार्सिलोनालाई खेलमा फर्काउने संकेत दिए । तर, इन्ज्युरी समयको पाँचौं मिनेटमा क्रिष्टियन स्टुएनीले गोल गर्दै बार्सिलोनालाई हार चखाए ।

यस जितसँगै रियल म्याड्रिडलाई २ अंकले पछि पार्दै जिरोना शीर्षस्थानमा उक्लिएको छ । यो सिजन उच्च प्रदर्शन गरिरहेको जिरोनाको १६ खेलबाट १३ जित, २ बराबरी र १ हारका साथ ३९ अंक जोडेर शीर्षस्थानमा छ । रियलको ३९ अंक छ ।

पराजित बार्सिलोना १६ खेलबाट ३४ अंक जोडेर चौथो स्थानमा रहँदा तेस्रो स्थानमा उक्लने मौका गुमाएको छ । समान ३४ अंक रहेपनि एट्लेटिको मड्रिड गोलअन्तरमा अघि छ ।

ला लिगाकै अर्काे खेलमा एट्लेटिको मड्रिडले अल्मेरियालाई २–१ ले पराजित गरेको छ । एट्लेटिकोको जितमा अल्भारो मोराटा र एन्जल कोरेआले गोल गरे । अल्मेरियाका लियो बाप्टिस्टाओले एक गोल फर्काए ।