काठमाडौँ (हाम्रो खेलकुद) – राष्ट्रिय फुटबल टोलीका पूर्व कप्तानहरु सम्मिलित सिएमजी क्लब भेट्रान्स टोली भारतको कोलकातामा जारी आठौं कोलकाता भेट्रान्स अन्तर्राष्ट्रिय आमन्त्रण सकर च्यालेन्जको सेमिफाइनलमा पुगेको छ ।

राष्ट्रिय टोलीका पूर्व कप्तान बालगोपाल महर्जनले टेलिफोनमा दिएको जानकारी अनुसार समूह बीको विजेताका रुपमा सिएमजी अन्तिम चारमा पुगेको छ । एट ए साइडको पहिलो खेलमा कोलकाता भेट्रान्ससँग २–२ को बराबरीमा रोकिएको सिएमजीले त्यसपछिको खेलमा युनाइटेड भेट्रान्सलाई ३–२ र जलपाइगुडीलाई २–० ले हराएको थियो ।
सिएमजीका लागि पहिलो खेलमा कल्यान खड्गी र नरेन्द्र श्रेष्ठले गोल गरे । दोस्रो खेलमा पूर्व कप्तानद्धय उपेन्द्रमान सिंह र बालगोपाल तथा टोलीका कप्तान राजेश मानन्धरले गोल गरे । तेस्रो खेलमा उपेन्द्रमान र नरेन्द्र श्रेष्ठको गोलमा सिएमजी विजयी भएको थियो ।
युनाइटेड भेट्रान कोलकाताको आयोजनमा प्रतियोगिता शनिबारबाट सुरु भएको हो । प्रतियोगिता कोलकातास्थित हरिनाबी स्पोर्टीङ्ग क्लबको मैदानमा जारी छ । प्रतियोगितामा विभिन्न देशका ८ भेट्रान क्लबको सहभागिता छ । सिएमजी क्लबमा अधिकांश खेलाडी नेपाली राष्ट्रिय फुटबल टोलीका पूर्व सदस्य छन् । पूर्व राष्ट्रिय खेलाडी राजेश मानन्धरको कप्तानीमा रहेको टोलीमा उपेन्द्रमान सिहं, बालगोपालसहित राकेश थापा, चेतनारायण श्रेष्ठ,सौगेश श्रेष्ठ, राजन नेपाली, नरेन्द्र श्रेष्ठ र राजु सिंह महर्जन रहेका छन् । त्यस्तै विजय श्रेष्ठ, अमिर डंगोल, हरिओम श्रेष्ठ,कल्याण खड्की, प्रकाश बैद्य र लक्ष्मण श्रेष्ठ रहेका छन् ।
टोलीको प्रशिक्षकमा जय कृष्ण श्रेष्ठ,रविन्द्र खड्की व्यवस्थापक रहेको छन् । संगारत्न महर्जन, अष्ट कुमार कवे र राजेश जोशी टोलीको अफिलिसयका रुप्मा रहेका छन् ।