एजेन्सी – उडिनेसमाथि सानदार जित दर्ता गर्दै इन्टर मिलान इटालियन सिरी ‘ए’ को शीर्षस्थानमा उक्लदा एसी मिलानले भने हार बेहोरेको छ ।

इन्टरले घरेलु मैदानमा उडिनेसमाथि ४–० को सानदार जित निकाल्दै युभेन्टस्लाई पछि पार्दै शीर्षस्थानमा उक्लन सफल भएको हो । इन्टरको सहज जितमा हकान चलहानोग्लु, फेडरिको डिमार्काे, मार्कस थुराम र लौउटारो मार्टिनेजले गोल गरे ।

मिलानोमा शुक्रबार राति भएको खेलमा इन्टरले खेलको ३७औं मिनेटमा हकानको पेनाल्टी गोलबाट १–० को अग्रता लिएको थियो । ४२औं मिनेटमा फेडरिको डिमार्काेले गोल गर्दै इन्टरको अग्रता दोब्बर पारे ।

त्यसको दुई मिनेटपछि नै मार्कस थुरामले गोल गरेपछि इन्टरले पहिलो हाफमा ३–० को आरामदायी अग्रता लिन सफल भयो । त्यसपछि ८४औं मिनेटमा मार्टिनेजले गोल गर्दै इन्टरलाई सहज जित दिलाए ।

मार्टिनेजको उडिनेसविरुद्धको गोल सन् २०२३ मा २९औं गोल हो । सन् २००० यता, इन्टरका कुनैपनि खेलाडीले एक क्यालेन्डरमा सिरी ‘ए’ मा यति गोल गरेका छैनन् ।

यस जितले इन्टरले शीर्षस्थानमा युभेन्ट्सलाई २ अंकले पछि पारेको छ । शीर्षस्थानको इन्टरको १५ खेलबाट ३८ अंक पुगेको छ । समान खेलबाटै युभेन्ट्सको ३६ अंक छ । पराजित उडिनेस १२ अंक जोडेर १६औं स्थानमा छ ।

सिरी ‘ए’ कै अर्काे खेलमा एसी मिलान घरेलु टोली एटलान्टासँग ३–२ ले पराजित भएको हो । एटलान्टाको जितमा एडेमोला लुकमनले दुई तथा लुइस मुरेलले एक गोल गरे । मिलानका ओलिभर जिरुड र लुका जोभिकले गोल फर्काए ।

अन्तिम समयमा मिलान १० खेलाडीमा समेटिन पुगेको थियो । डाभिड कालाब्रिया इन्ज्युरी समयको थप गरिएको तेस्रो मिनेटमा दोहोरो पहेँलो कार्ड खाँदै मैदानबाट बाहिरिएका थिए । त्यसपछि लुइसले गोल थप्दै मिलानलाई हार चखाए ।

यस जितले एटलान्टा १५ खेलबाट २३ अंक जोडेर सातौं स्थानमा उक्लिएको छ । पराजित मिलान २९ अंक जोडेर तेस्रो स्थानमा यथावत रहँदा शीर्ष टोलीसँगको अंक दुरी छोट्याउने मौका गुमाएको छ ।