सुबास हुमागाईं, काठमाडौं

नेपाली राष्ट्रिय फुटबल टोलीका लागि गोलरक्षक किरण चेम्जोङले सबैभन्दा धेरै खेल खेलेका छन् । राष्ट्रिय टोलीको लागि १ सय खेल खेल्ने दुर्लभ उपलब्धि नजिक पुगेका उनी उमेरले ३४ वर्ष पुगिसकेका छन् ।

लामो समय किरणलाई राष्ट्रिय टोलीमा साथ दिएका विशाल श्रेष्ठ र विकेश कुथु पनि राष्ट्रिय टोलीबाट पछिल्लो समय बाहिर छन् । यस्तोमा अब गोलरक्षकको दिर्घकालिन विकल्प नेपालको प्राथमिकतामा परेको छ ।

पछिल्लो केही वर्षयता दीप कार्की दोस्रो रोजाइको गोलरक्षकको रुपमा रहेका छन् । तर उनले आफैं सिनियर टोलीमा खासै अवसर पाएका छैनन् । घरेलु फुटबलमा पनि उनको प्रदर्शन औसत नै छ ।

तेस्रो रोजाइको भूमिकामा गोलरक्षकको दौड निकै खुला छ । र यो दौडमा केहि युवा गोलरक्षक प्रतिस्पर्धामा छन् । तर एनएसएलले यो संकटको घडीमा मल्हम लगाउने काम भने गर्न सकेको छैन ।

राष्ट्रिय टोलीका प्रशिक्षक भिन्सेन्जो अल्बर्टो अनेसेले अनुभवी विशाल र विकेशलाई आफ्नो योजनामै राखेका छैनन् । लिगमा राम्रो प्रदर्शन गरेपनि उमेरको कारण देखाउँदै यी दुई प्रशिक्षकको रोजाइमा छैनन् ।

लिगको प्रदर्शनका आधारमा उनले युवा गोलरक्षक अभिषेक बराल, अनिश देउला, सन्तोष महत, लगायतलाई राष्ट्रिय टोलीको प्रशिक्षणमा बोलाएका थिए । त्यसअघि अब्दुल्लाह अलमुताइरीले टिकेन्द्रसिंह थापा, शत्रुघन चौधरी र विशाल सुनारलाई आफ्नो योजनामा समेटेका थिए । तर अभिषेकबाहेक यी सबै एनएसएलको बेन्चमा सिमित छन् ।

यसपटक एनएसएलमा सहभागी ९ मध्य ५ क्लबले विदेशी गोलरक्षक अनुबन्ध गरेका छन् । झापामा सर्बियाका स्टेफान कुपिक, ललितपुरमा फ्रान्सका जेफ्री बाल्टुस र बुटवलमा क्यामरुनका एन मामादु पहिलो पटक नेपाल आएका छन् । ए डिभिजन अनुभव बोकेका एभ्स प्रिसो पोखरा र मोहमद ताहा धनगढीबाट खेलिरहेका छन् ।

एनएसएलका आधा भन्दा बढी टोलीले विदेशी गोलरक्षक रोज्दा काठमाडौं रेजर्सले अभिषेक बराल रोजेको छ भने अन्य तीन टोलीले कप्तान र मार्कीको भूमिकामा गोलरक्षकलाई रोजेका छन् । विशाल श्रेष्ठले चितवन, दीप कार्कीले वीरगन्ज र विकेश कुथुले इलामको नेतृत्व गरिरहेका छन् ।

मंगलबार सिजनको पाँचौ खेलपछि इलामका कप्तान विकेशले झापाको बेन्चमा अनिश देउलालाई देख्दा निकै नराम्रो लागेको बताए । खेलमा आधा दर्जन बढी बचाउ गरेर इलामको जितमा महत्त्वपूर्ण भूमिका खेलेका विकेशले नेपालका युवा गोलरक्षक बेन्चमा बस्नु राम्रो संकेत नभएको बताए ।

‘मैले झापाको बेन्चमा हाम्रो देशका युवा गोलरक्षक अनिशलाई देख्दा निकै नराम्रो लाग्यो । ए डिभिजनमा राम्रो प्रदर्शन गरेर राष्ट्रिय टोलीको प्रशिक्षणमा पुगेका उनी अहिले बेन्चमा छन् । यो पक्कै पनि हाम्रो देशको लागि राम्रो होइन । उनी देशका भविष्य हुन्,’ विकेशले भने ।

गोलरक्षक पोजिसन हरेक टोलीमा निकै गम्भीर हुने भएकाले प्राय फ्रेन्चाइज टोलीले यसमा जोखिम लिन चाहेका छैनन् । तर यसो भनिरहँदा नेपालको फुटबल विकासमा योगदान पुर्याउन भनिएको पक्ष पनि हेर्नुपर्छ । चीनमा यस्तै समस्या नआवोस भनेर गोलरक्षक पोजिसनमा भने विदेशी खेलाडी अनुबन्ध गर्न नपाइने नियम छ । गोलरक्षकमा अन्य पोजिसनजस्तो धेरै विकल्प नहुने कारण पनि चीनले यो रणनीति लिएको हो ।

यसपटक विदेशी खेलाडी संख्या बढाइएको कारण पनि धेरै टोलीले गोलरक्षक अनुबन्ध गरेका छन् । एनएसएलमा एक टोलीले ६ जनासम्म विदेशी अनुबन्ध गरेर ५ जना खेलाउन पाइने नियम छ । यसले गोलरक्षक पोजिसनमा भने अन्याय भएको छ ।

विकेशले गोलरक्षकको खडेरी परेको यो अवस्थाकै कारण आफ्नो खेल करिअरपछि गोलरक्षक प्रशिक्षणमा समय दिने बताए । यद्यपि उनले नेपालमा स्तरीय गोलरक्षक प्रशिक्षकको कमी भने नभएको बताए । ‘हामीले पनि नेपाली गोलरक्षक प्रशिक्षकबाट नै सिकेका हौं । खेलेर यहाँसम्म आएका छौं । अब आफूले पनि केहि योगदान दिनुपर्छ भन्ने हो । होला विदेशका प्रशिक्षक आउँदा थोरै फरक हुन्छ, तर यहाँ पनि राम्रो गोलरक्षक प्रशिक्षक हुनुहुन्छ,’ विकेशले भने ।