काठमाडौं (हाम्रो खेलकुद) – नेपाल सुपर लिगको दोस्रो संस्करणको उद्घाटन खेलमा काठमाडौं रेजर्स विजयी भएको छ ।

काठमाडौँले नवप्रवेशी टोली स्पोर्टिङ इलाम एफसी माथि १-० को जित निकालेको हो । काठमाडौंका लागि राजीव लोप्चनले खेलको एकमात्र गोल गरे ।

भव्य उद्घाटन समारोहका साथ दशरथ रंगशालामा सुरु भएको एनएसएलको दोस्रो संस्करणको पहिलो खेलमा दुवै टोलीले सोचे अनुरूपको खेल भने प्रदर्शन गर्न सकेनन् । खेलमा धेरै स्पष्ट मौकाहरु सृजना गर्न सकेनन् ।

पाँचौं मिनेटमा काठमाडौंका शोखरुखको फ्री किक इलाम गोलरक्षक विकेश कुथुले सहजै समाते । १२औं मिनेटमा इलामका अमाथ एनडवको लामो दूरी बाट लिएको प्रहार पनि काठमाडौं गोलरक्षक अभिषेक बरालले बचाए ।

१९औं मिनेटमा शोखरुखको थ्रु-पासमा काठमाडौंका कप्तान हिसुब थपलियालाई इलामका कप्तान विकेशले विफल पारे । त्यही नै पहिलो हाफको सबैभन्दा स्पष्ट मौका थियो । त्यसपछि भने खेलमा स्पष्ट मौका सिर्जना भएन ।

५१औं मिनेटमा काठमाडौँले खेलमा अग्रता लियो । शोखरुखको कर्नर कीकमा राजीव लोप्चनको ब्याकहिल गर्न खोज्दा इलाम गोलरक्षक विकेशले समात्न नसकेपछि बल राजीवकै खुट्टामा पुग्यो र उनले सहजै बललाई पोस्टको दिशा देखाउँदै अग्रता दिलाए ।

गोल पछि दुवै टोलीले खेलमा पकड जमाउन सकेका थिएनन् । इलामले पनि बराबरी गर्ने मौका सिर्जना गर्न सकेन ।

८१औं मिनेटमा फोडे कमाराको लामो दूरीको प्रहारले पोस्टको दिशा लिन सकेन । त्यही नै इलामका लागि बराबरी गर्ने एकमात्र मौका रहेको थियो ।

एनएसएलमा भोलि दुई खेल हुँदै छन् । दिउँसो २:३० बजे हुने खेलमा पोखरा थन्डर्स र एफसी चितवन भिड्दा बेलुका ५:३० बजे बुटवल लुम्बिनी एफसी र ललितपुर सिटी एफसी भिड्ने छन् ।