काठमाडौं (हाम्रो खेलकुद)– राष्ट्रिय टोलीका स्ट्राइकर अन्जन विष्टले गत साताबाट स्पेनको मार्बेला युनाइटेड एफसीमा प्रशिक्षण लिन सुरु गरेका छन् । अभ्यास र ट्रायलका लागि भन्दै अन्जन जनवरी ९ मा त्यसतर्फ प्रस्थान गरेका थिए ।

उनी तीन महिनाका लागि त्यहाँ पुगेका हुन् । ‘५/६ दिन देखि प्रशिक्षण गरिरहेको छु’ अन्जनले हाम्रो खेलकुदसँग टेलिफोनमा भने, ‘कहिले सम्म अभ्यास वा ट्रायल केही भनिएको छैन । म नियमित प्रशिक्षण गरिरहेको छु । ’ पुस १५ गते सातौं राष्ट्रिय खेलकुदको फुटबलमा एपिएफलाई स्वर्ण पदक दिलाउन महत्वपूर्ण भूमिका खेलेपछि उनी स्पेन लागेका थिए ।

स्पेन जानुअघि उनलाई एपिएफले उनीसहित ६ खेलाडीलाई मस्ट भ्यालुएवल प्लेयरबाट सम्मानित गरेको थियो । ६ मध्ये अन्जनका दाई एपिएफकै स्ट्राइकर रञ्जन पनि थिए । सातौं राष्ट्रिय खेलकुद फुटबलको फाइनलमा अन्जनकै २ गोलमा आर्मीलाई २–० ले हराउँदै एपिएफ च्याम्पियन बनेको थियो । स्पेनको मार्बेला त्यहि क्लब हो जसमा अन्जन र राष्ट्रिय टोलीका रक्षक अनन्त तामाङले गत बर्ष केही साता अभ्यास गर्नुका साथै केही मैत्रीपूर्ण खेल खेलेका थिए ।
गत बर्ष फागुनमा उनीहरुले मार्बेलाले नेदरल्यान्ड्स पुगेर मैत्रीपूर्ण खेल खेलेका थिए । सोही क्लबमा राष्ट्रिय टोलीका अर्का स्ट्राइकर बिमल पनि जाने बताइएको छ । बिमल अहिले बल्जियम छन् । विगतमा जस्तै अहिले पनि लुइस डी ब्रायजले उनीहरुको अभ्यासको व्यवस्था मिलाएका हुन् ।
स्पेन यात्रालाई जानुअघि हेटौडाका अन्जनले भनेका थिए ‘हामीले पहिला पनि त्यहाँ गएर अभ्यास गरिसकेका छौं । फेरी मौका मिलेको छ । त्यहाँको वातावरण र अभ्यास हाम्रो भन्दा धेरै स्तरीय छ । यसले मलाई र राष्ट्रिय टोलीलाई फाइनल पुग्ने विश्वास छ ।’ मार्बेला युनाइटेड युएस सकर एकेडेमीको शाखाको रुपमा स्पेनको मालागामा स्थापित क्लब हो । सुरुमा युएस सकरकै नाममा स्थापना गरिए पनि २०१४ मा मार्बेला युनाइटेड एफसी नाम राखिएको क्लबको बेभसाइटमा उल्लेख छ ।
नेपालले पछिल्लो डेढ बर्षमा फुटबलमा चारवटा उपाधि जितेको थियो । अन्जन र बिमल नेपालले प्राप्त गरेका सबै सफलता दिलाउने टोलीका सदस्य हुन् । गत भदौमा काठमाडौंमा साफ यु–१९ उपाधि उचालेको नेपालले माघमा बंगलादेशमा बंगबन्धु गोल्डकप जितेको थियो भने यु–२३ टोलीले फागुनमा भारतमा १२ औं दक्षिण एसियाली खेलकुद (साग) अन्तर्गत फुटबलमा स्वर्ण पदक जितेको थियो । सबैभन्दा ठूलो सफलताका रुपमा अन्जन र बिमलसहितको टोलीले झन्डै दुई महिनाअघि मलेसियामा सोलिडारिटी कप जितेको थियो ।