पोखरा (हाम्रो खेलकुद)– खेल सकिन ३ मिनेट बाँकी रहँदा परिवर्तित अनिल गुरुङले गोल गरेपछि सिएमजी क्लब संकटा विभागिय टोली पुलिसलाई २–१ ले हराउँदै १५ औं आहा रारा गोल्ड कप फुटबल प्रतियोगिताको क्वार्टरफाइनलमा पुगेको छ ।

१–० ले पछि परेको खेल उल्टाउँदै संकटा अन्तिम आठमा पुगेको हो । आहाको सर्वाधिक सफल टोली पुलिस लगातार दोस्रो पटक पहिलो चरणबाटै बाहिरिएको छ । यो सँगै क्वार्टरफाइनल समिकरण पुरा भएको छ । संकटाले अब खस्र्याङ् युनाइटेडको सामना गर्नेछ ।

रिबाउन्डमा प्राप्त बलमा ६१ औं मिनेटमा मैदान प्रवेश गरेका अनिलले नजिकबाट गोल गरेका थिए र त्यहि गोल निर्णायक बनेको थियो । विश्व अधिकारीको प्रहार पुलिसका गोलकिपर दीपेश यादवले रोके, उनले पूर्ण नियन्त्रणमा लिन नसकेपछि प्राप्त बलमा अनिलले गोल गरेका हुन् । अनिल शुसिल केसीको ठाँउमा मैदान प्रवेश गरेका थिए ।

त्यसअघि रवि पासवानले ३५ औं मिनेटमा गरेको गोलमा पाँच पटकको च्याम्पियन पुलिसले अग्रता लिएको थियो । मैदानको दायाँबाट रविले क्रस गरेको बल गोलमा परिणत भएको थियो । रविको प्रहार संकटाका गोलकिपर विनयले रोक्नुअघि गोल भइसकेको थियो । ७३ औं मिनेटमा संकटा बराबरी गोल गर्दै खेलमा फर्केको थियो ।

झन्डै ३० यार्डमा पाएको फ्रिकिकलाई विश्व अधिकारीले सोझै गोलमा परिणत गरेपछि संकटाले खेलमा बराबरी गरेको थियो । विश्व खेलेको म्यान अफ दी म्याच घोषित भए । आहा गोल्डकपको सर्वाधिक सफल पुलिस २०६६ यता फाइनल पुग्न सकेको छैन । त्यस्तै संकटा यसअघिका दुई सहभागितामा क्वार्टरफाइनल सम्म पुगेको थियो ।

आहा गोल्डकपमा शनिबार पहिलो क्वार्टरफाइनल
सहाराविरुद्ध सिक्किम युनाइटेड, भारत