एजेन्सी – सुपरस्टार फुटबलर किलियन एमबाप्पेको २ गोलको मद्दतले फ्रान्सले युरो २०२४ को छनोट खेलमा नेदरल्याण्ड्सलाई पराजित गरेको छ। फ्रान्सले डच टोली माथि २-१ को जित निकालेको हो।

खेलको सातौं मिनेटमा एमबाप्पेले फ्रान्सलाई अग्रता दिलाए। जोनाथन क्लसको सुन्दर क्रसमा बललाई जालीको दिशा देखाउँदै उनले पहिलो गोल गरेका थिए।

५३औं मिनेटमा एमबाप्पेले सानदार गोल गर्दै अग्रता दोब्बर बनाए। उनले बक्स बाहिर बाट सटिक प्रहार गर्दै नेदरल्याण्ड्स गोलरक्षक बार्ट भरब्रुग्गन लाई बिट गरेका थिए।

खेलको ८३औं मिनेटमा नेदरल्याण्ड्सका कुइलिन्डिश्चि हार्टमानले एक गोल फर्काए पनि खेलमा फ्रान्सले जित हासिल गर्यो।

समूह बि मा रहेको फ्रान्सले ६ खेलमा सबै खेल जित्दै यूरो कपका लागि छनोट समेत भएको छ। सोही समूहमा दोस्रो स्थानमा रहेको ग्रीसको १२ अंक रहँदा एक खेल कम खेलेको नेदरल्याण्ड्सको नौं अंक छ।

एमबाप्पे सर्वाधिक गोलकर्ताको तालिकामा चौथो स्थानमा उक्लिएका छन्। उनले ७२ खेलमा ४२ गोल गरेका छन् । उनले मिचेल प्लाटिनीले गरेको ४१ गोललाई पछि पारेका हुन्।

फ्रान्सका सर्वोत्कृष्ट गोलकर्ता ओलिभियर जिरुडको ५४ गोल रहेको छ। दोस्रो स्थानमा रहेका थियरी हेनरीको ५१ गोल रहँदा एन्टोआन ग्रिजम्यानको ४४ गोल छ।