पोखरा (हाम्रो खेलकुद)– आहा रारा गोल्डकप फुटबल प्रतियोगितामा बिहीबार विल्कुल अपरिचित दुई टोलीबीच भिडन्त हुँदैछ । जहाँ पहिलो चरणको तेस्रो खेलमा झापा ११ र अमेरिकामा रहेका नेपाली खेलाडी सम्मिलित एनएनए युएसए टोलीबीच प्रतिस्पर्धा हुनेछ ।

झापा त्यो टोली हो जो पछिल्ला दुई बर्षमा राष्ट्रिय फुटबलमा स्थापित हुने क्रममा छ । २०७२ मा राष्ट्रिय लिगमा चौथो भएको झापाले त्यसयता थ्रुपै घरेलु प्रतियोगितामा सफलता प्राप्त गरिसकेको छ । त्यसमा पनि विशेषगरि पूर्वेली फुटबलमा झापा स्थापित भइसकेको छ ।

यता राष्ट्रिय टोलीका पूर्व खेलाडी प्रलय राजभण्डारीको कप्तानीमा एएनए युएसए पहिलो पटक पोखरा आइपुगेको छ । यद्दपी प्रलयका लागि भने आहा रारा गोल्डकप पहिलो होइन । रुस्लान थ्री स्टारले २०६९ मा ११ औं संस्करणको आहा रारा गोल्डकप जित्दा प्रलय पनि खेलेका थिए । एनआरटी, थ्री स्टारबाट व्यवसायिक लिग खेलेका प्रलय पछिल्लो एक दशकदेखि अमेरिका बस्दै आएका छन् । प्रलयले सन् २००५ मा पाकिस्तानमा भएको साफ च्याम्पियनसिपमा ‘डेब्यू’ गरेको थियो ।

अमेरिकाका विभिन्न राज्यमा भएका नेपालीहरुबीच छनोट गराउँदै एनएनएले पोखरा आउने टोली तयार पारेको थियो । प्रलयले जित्ने लक्ष्यका साथ पोखरा आएको बुधबार पत्रकार सम्मेलनमा बताइसकेका छन् । एएनए का अध्यक्ष मेदीनी अधिकारीले आफुहरु खेल जित्नको लागि भन्दा पनि मनका भावना साट्न आएको बताएका थिए । उनले भनेका ‘विश्वमा ४० लाखको हाराहारीमा नेपाली विदेशमा छन् तर उनीहरुको मन संधै नेपालमा नै हुन्छ । आखिर जहाँ भए पनि यो मन त नेपाली हो ।’

झापा पूर्वका दुई उपाधि जितेर पोखरा आइपुगेको छ । पुस अन्त्यतिर केही दिनको फरकमा काँकरभिट्टा गोल्डकप र फाल्गुनन्द गोल्डकप जितेको झापा आहा रारा गोल्डकपमा गत बर्ष सेमिफाइनल सम्म पुगेको थियो । झापाको यो तेस्रो सहभागिता हो । दुई बर्षअघि पहिलो सहभागिता थ्री स्टारसँग २–० ले पहिलो खेलमै पराजित भएर घर फर्केको झापाले गत बर्ष पहिलो खेलमा पुलिसलाई २–०, क्वार्टरफाइनलमा गाजिरकार्ट स्र्पोर्टिङ क्लबलाई ४–१ ले हराउँदै सेमिफाइनल पुगेको थियो ।

झापा सेमिफाइनलमा लक्ष्मी हुन्डाई मनाङ मस्र्याङ््दीसँग ४–० ले पराजित भएको थियो । फाइनलमा आर्मीलाई हराउँदै मनाङ च्याम्पियन बनेको थियो । यसपटक माघ ९ मा मनाङले धरान फुटबल क्लबसँग खेल्दै उपाधि रक्षाको यात्रा सुरु गर्नेछ । धरानले बुधबार एपिएफलाई १–० ले हराएर मनाङसँगको भेट पक्का गरेको थियो ।