काठमाडौं (हाम्रो खेलकुद )- नेपाल र म्यानमारले यंगोनमा भइरहेको पहिलो मैत्रीपूर्ण खेलको पहिलो हाफमा गोलरहित बराबरी खेलेका छन्।

थुवुन्ना रंगशालामा भएको खेलमा दुवै टोलीले पाएको अवसरहरूको सदुपयोग गर्न सकेका छैनन्।

नवौं मिनेटमा अनन्त तामाङले लिएको फ्रि किकले वाल कटाउन सकेन। १७औं मिनेटमा सनिश श्रेष्ठको फ्रि किकमा तामाङले नै गरेको हेडर पोस्टको केही टाढा बाट बाहिरियो। एक मिनेट पछि म्यानमारका कप्तान लुविनले खुला भने अवस्थामा लिएको सटले गोल पोस्टको दिशा लिन सकेन।

२३औं मिनेटमा लुविनकै क्रस अनन्तले क्लियर गरेपछि बल लिन औंङको खुट्टामा आएको थियो तर उनको प्रहार पनि बाहिरियो। २९औं मिनेटमा औंग थु ले रोहित चन्दको खराब निकासीको सदुपयोग गर्न सकेनन्। उनको फितलो प्रहार किरणले सजिलै समाते। ३४औं मिनेटमा आशिष चौधरीले लिएको सट म्यानमारका गोलरक्षक जिन फ्योले बचाए। ३७औं मिनेटमा औंग थु को सटमा किरणले उत्कृष्ट बचाउ गरे।

थपिएको समयमा म्यानमारका कप्तानले अर्को सुनौलो अवसर खेरा फाल्दा नेपाल पहिलो हाफमा एक गोलले पछाडि जान बाट बाँचेको समेत थियो। उनका किरण मात्र थिए र उनी बक्समा खाली थिए। तर उनको प्रहार पोस्टको निकै टाढा बाट बाहिरियो।

नेपालका प्रशिक्षक अनेसेले यस खेलमा जिल्लेस्पी जीलेस्पी जंग कार्कीलाई पहिलो अन्तर्राष्ट्रिय खेलको मौका दिएका छन् भने फरवार्ड आशिष चौधरी लाई लेफ्ट-ब्याकको भूमिकामा उतारेका छन्।

यो दुई टोली बीचको दुई मध्येको पहिलो मैत्रीपूर्ण खेल हो। अर्को खेल सेप्टेम्बर ११ का दिन यही रंगशालामा हुने छ।