एजेन्सी – स्पेनिस ला लिगा अन्तर्गत आइतबार भएको खेलमा गेटाफेले क्याटलान क्लब बार्सिलोनालाई बराबरीमा रोकेको छ ।

निकै तनावपूर्ण खेलमा बार्सिलोनाले अधिकांश समय खेलमा पकड जमाएपनि गोल गर्न भने सकेन । खेलमा दुवै तर्फ १-१ खेलाडीले रातो कार्ड प्राप्त गर्दा बार्साका प्रशिक्षक जाभी हर्नान्डेजले पनि मैदान छाड्नुपरेको थियो ।

बार्सिलोनाले जर्मन मिडफिल्डर इल्काए गुन्डोगनलाई डेब्यु दिएको खेलमा राम्रो सुरुवात गरेको थियो । तर गुन्डोगनले सुरुवाती समयमा नै अफसाइड हुँदा अग्रता दिलाउन सकेनन् । ४२ औं मिनेटमा ब्राजिलियन विंगर राफिन्हाले गेटाफेका गास्टन अल्भारेजलाई कुइनोले हानेपछि रातो कार्ड पाए ।

दोस्रो हाफमा गेटाफे पनि १० खेलाडीमा समेटियो । जेमी माटाले ५७ औं मिनेटमा दोस्रो पहेंलो कार्ड पाएपछि दुवै टोली समान खेलाडीमा थिए । त्यसपछि रेफ्रीसँग विवाद गरेका कारण जाभीले पनि रातो कार्ड पाएका थिए ।

दोस्रो हाफमा बार्सिलोनाले आक्रमणमा थप मिहिनेत गरेपनि लेवान्डोस्कीको हेडर गोललाइनबाट क्लियर हुँदा बार्सिलोना अघि बढ्न सकेन । खेलमा ७५ प्रतिशत बल पोसेसन राखेर १४ सट प्रहार गरेको बार्सिलोना अंक बाँड्न बाध्य भयो ।

ला लिगामा आइतबार नै सेल्टा भिगो घरेलु मैदानमा ओसासुनासँग २-० ले पराजित भयो । अर्को खेलमा रियल बेटिसले भिल्लारियलको मैदानमा २-१ को जित निकाल्यो ।