क्वालालम्पुर (एजेन्सी) – आगामी मार्च महिनाबाट सुरु हुने एएफसी एसियन कपको छनोट चरणको ड्रका लागि एएफसीले वरियता सार्वजनिक गरेको छ।

२४ टोली सहभागी हुने छनोटमा नेपाल २२औं स्थानमा परेको छ। २४ टोलीलाई ४ पटमा विभाजित गरेर ‘ड्र’का दिन ६ समुहमा विभाजन गरिने प्रावधान रहेको छ। शीर्ष ६ टोली पट ‘ए’मा रहनेछन् भने तलका ६ टोली पट ‘डि’मा रहनेछन्। पट ‘बि’ र ‘सि’मा भने वरियतामा ७-१२ र १३-१८औं स्थानमा रहेको टोली रहनेछन्।

नेपालसंगै पट ‘डि’मा मलेसिया, सिङ्गापुर, कम्बोडिया, भुटान र मकाउ रहेका छन्। एकै पटका दुई टोली ड्रमा एकै समुहमा नपर्ने प्रावधान छ। एक समुहमा प्रत्यक पटको १-१टोली समावेश गरेर चार टोली छनोट गरिन्छ।
पट ‘ए’ मा जोर्डन, ओमान, फिलिपिन्स, बहराइन, किर्गिस्तान र उत्तर कोरिया रहेका छन् भने पट ‘बि’मा भारतसंगै प्यालेस्टाइन, भिएतनाम, ताजिकिस्तान, हङकङ र तुर्कमेनिस्तान रहेकाछन्। पट ‘सि’मा भने माल्दिभ्स, यमन, लेबनान, अफगानिस्तान, चाइनिज चाइपेई र म्यानमार छन्।
ग्वामले आर्थिक अवस्थाको कारण देखाउँदै छनोटमा भाग नलिएपछि नेपालको भाग्य खुलेको थियो भने कुवेत फिफाको निलम्बनमा पर्दा सोलिडारीटि कपको उपविजेता मकाउले मौका पाएको हो। छनोट चरणको ड्र जनवरी २३ तारिखमा हुनेछ।