मड्रिड (एजेन्सी)– स्पेनिस फुटबल इतिहासमा नयाँ कीर्तिमान कायम गर्दै रियल मड्रिड कोपा डेल रेको क्वार्टरफाइनलमा पुगेको छ । अन्तिम १६ को दोस्रो लेगमा बिहीबार राती सेभियासँग ३–३ को बराबरी खेलेपनि समग्रमा ६–३ को अग्रतासहित रियल कोपा डेल रेको अन्तिम आठमा पुगेको हो ।

घरेलु मैदानमा क्रिस्टियानो रोनाल्डो, लुका मोड्रिच विना पहिलो लेगमा रियलले ३–० ले जितेको थियो । पहिलो लेगकै सेटलाई प्रशिक्षक जिनेदिन जिदानले विश्वास गरेर दोस्रो लेगमा उतारेका थिए । त्यो बराबरीसँगै स्पेनिस फुटबलमा रियालको अपराजित खेल संख्या ४० पुगेको छ । लुइस इन्रिकेको बार्सिलोनाको लगातार ३९ खेलमा अपराजित रहेको कीर्तिमानलाई रियलले तोडेको हो । अन्तिम मिनेटमा करिम बन्जिमाले बराबरी गोल गरेपछि टोलीले अपराजित यात्रा लम्बाउन सफल भएको थियो ।

३–१ ले पछि परेको खेलको अन्तिम ७ मिनेटमा दुई गोल फर्काउँदै रियल बराबरी गर्न सफल भएको थियो । डानिलोको आत्मघाती गोलमा सेभियाले नवौंं मिनेटमा अग्रता लिएको थियो । विसम वेन येडेरले गोलको मौका नचुकाएको भए रियल थप दबाबमा पर्ने थियो । ४८ औं मिनेटमा मार्को एसेन्सियोले बराबरी गोल फर्काए । तर बराबरी लामो समय टिकेन, स्टेभन जोभेटिकले ५४ औं मिनेटमा गोल गर्दै सेभियालाई अग्रता दिलाए । ७७ औं मिनेटमा भिसेन्टे इबोराले सेभियाका लागि अर्को गोल गर्दा रियल दबाबमा परेको थियो । ८३ औं मिनेटमा कप्तान सर्जियो रामोसले पेनाल्टीमा गोल फर्काएपछि रियल खेलमा फर्केको थियो । बेन्जिमाले ९० औं मिनेटमा गोल गरेपछि टोलीले खेलमा बराबरीमात्र गरेन स्पेनिस फुटबलमा नयाँ इतिहास पनि रच्यो ।

उता स्पेनिस ला लिगामा भने रियल ४० अंकसहित शीर्षस्थानमा छ भने १ खेल बढी खेलेको दोस्रो स्थानको सेभियाको ३६ अंक छ । तेस्रो स्थानको बार्सिलोनाको ३५ अंक छ ।

कोपा डेल रेका अन्य खेलमा सेल्टा भिगोले भ्यालेन्सियालाई २–१ ले हरायो भने एबार र ओसासुनाले गोलरहित बराबरी खेले । पहिलो लेगमा ४–१ ले जितेको सेल्टा भिगो समग्रमा ६–२ तथा पहिलो लेग ३–० ले जितेको एबार सोही समग्र अग्रताका सात अन्तिम आठमा पुगेका छन् ।